Publish Date: Sun, 12 Jan 2025 (11:22 IST)
Updated Date: Sun, 12 Jan 2025 (11:19 IST)
ഗിന്നസ് റെക്കോര്ഡ് പരിപാടിക്കായി കലൂര് രാജ്യാന്തര സ്റ്റേഡിയം ഉപയോഗിച്ചതിന് പിന്നാലെ മോശമായ പിച്ച് മത്സരത്തിന് സന്നദ്ധമാക്കാനുള്ള ശ്രമങ്ങള് ഊര്ജ്ജിതമാക്കി കേരള ബ്ലാസ്റ്റേഴ്സ്. നാളെ ഒഡീഷ എഫ് സിയുമായാണ് കേരള ബ്ലാസ്റ്റേഴ്സിന്റെ മത്സരം. നൃത്തപരിപാടിക്കായി പതിനായിരത്തോളം പേര് കയറിയതും വാഹനമെത്തിയതുമാണ് പിച്ച് നാശമാകാന് കാരണമായത്. നൃത്ത പരിപാടിക്കായി കേരള ബ്ലാസ്റ്റേഴ്സ് അനുവാദം നല്കിയിരുന്നെങ്കിലും മത്സരം നടക്കുന്നയിടം സുരക്ഷിതമാക്കണമെന്ന് നിബന്ധനയുണ്ടായിരുന്നു.
കലൂര് സ്റ്റേഡിയത്തില് നടന്ന ഗിന്നസ് നൃത്തപരിപാടിക്കിടെ ഉമാ തോമസ് എംഎല്എ വീണ് പരിക്കേറ്റ് ഗുരുതരാവസ്ഥയിലായിരുന്നു. സംഭവത്തില് ഓസ്കാര് ഇന്റര്നാഷണല് ഇവന്റ്സ് ഉടമയയ ജിനേഷിനെ കഴിഞ്ഞ ദിവസമാണ് പോലീസ് പിടികൂടിയത്. പരിപാടി സംഘടിപ്പിച്ചതടക്കം നിരവധി തട്ടിപ്പുകള് ഗിന്നസ് നൃത്തപരിപാടിയില് നടന്നതായി പിന്നീട് വാര്ത്തകള് പുറത്തുവന്നിരുന്നു. പിച് നശിപ്പിക്കപ്പെട്ടതോടെ അടുത്ത മത്സരത്തിന് മുന്പായി പിച്ച് ഫിഫ മാനദണ്ഡത്തിലെത്തിക്കാനുള്ള തത്രപാടിലാണ് കേരള ബ്ലാസ്റ്റേഴ്സ്.
