കൊവിഡ് രണ്ടാം തരംഗത്തിന്റെ മുന്നിൽ അടിപതറി അമേരിക്ക. ചെറിയ ഒരു ഇടവേളയ്‌ക്ക് ശേഷം കൊവിഡ് വീണ്ടും അമേരിക്കയിൽ ശക്തിപ്പെടുമ്പോൾ ഇക്കുറി കാര്യങ്ങൾ ആശങ്കയ്ക്ക് ഇടനൽകുന്നതാണ്. കഴിഞ്ഞ 24 മണീക്കൂറിനിടെ 2,700 പേർക്കാണ് കൊവിഡ് കാരണം മരണം സംഭവിച്ചത്. ഇന്നലെ മാത്രം 1,95,121 പേർക്കാണ് രാജ്യത്ത് രോഗം സ്ഥിരീകരിച്ചത്.
ഏപ്രിൽ മാസത്തിന് ശേഷം ഇതാദ്യമായാണ് അമേരിക്കയിൽ ഒറ്റ ദിവസത്തിൽ ഇത്രയധികം കൊവിഡ് മരണങ്ങൾ സംഭവിക്കുന്നത്. ഇതോടെ അമേരിക്കയിലെ കൊവിഡ് മരണങ്ങൾ 2,73,000 കടന്നു. കൊവിഡ് ആദ്യം സ്ഥിരീകരിക്കപ്പെട്ടത് മുതൽ കൃത്യമായ പ്രതിരോധ പ്രവർത്തനങ്ങൾ നടത്തിയിരുന്നെങ്കിൽ ഇത്രയധികം മരണങ്ങൾ സംഭവിക്കുന്നത് ഒഴിവാക്കാമായിരുന്നുവെന്നാണ് യുഎസിലെ സ്ഥിതിഗതികള്‍ വിലയിരുത്തിക്കൊണ്ട് പുറത്തുവന്ന വിവിധ റിപ്പോര്‍ട്ടുകള്‍ വിശദമാക്കുന്നത്.
