Ayatollah Khamenei: 'കണ്ണില്‍ പെട്ടിരുന്നെങ്കില്‍ തീര്‍ത്തേനെ'; ഇസ്രയേല്‍ ലക്ഷ്യമിട്ടത് ഖമനയിയെ ഇല്ലാതാക്കാന്‍, ഭൂഗര്‍ഭ അറയില്‍ ഒളിച്ചു !
ഇസ്രയേലിനൊപ്പം യുഎസും ഖമനയിയെ ഇല്ലാതാക്കുന്നതില്‍ അനുകൂല നിലപാട് സ്വീകരിച്ചിരുന്നു
Ayatollah Khamenei: ഇറാന്‍ പരമോന്നത നേതാവ് ആയത്തുള്ള ഖമനയിയെ ഇല്ലാതാക്കുകയായിരുന്നു തങ്ങളുടെ ലക്ഷ്യമെന്ന് ആവര്‍ത്തിച്ച് ഇസ്രയേല്‍. തങ്ങളുടെ കണ്ണില്‍ പെട്ടിരുന്നെങ്കില്‍ ഖമനയിയെ വധിക്കുമായിരുന്നെന്ന് ഇസ്രയേല്‍ പ്രതിരോധമന്ത്രി കാറ്റ്‌സ് പറഞ്ഞു.
ഇസ്രയേലിലെ കാന്‍ പബ്ലിക് ടെലിവിഷനു നല്‍കിയ അഭിമുഖത്തിലാണ് തങ്ങളുടെ പ്രധാന പദ്ധതി ഖമനയിയെ ഇല്ലാതാക്കുകയായിരുന്നെന്ന് ഇസ്രയേല്‍ പ്രതിരോധമന്ത്രി വെളിപ്പെടുത്തിയത്. ഇസ്രയേലിന്റെ ആക്രമണം മുന്നില്‍കണ്ട് ഖമനയി ഭൂഗര്‍ഭ അറയില്‍ ഒളിച്ചെന്നും കാറ്റ്‌സ് പറഞ്ഞു.
' ഖമനയി ഞങ്ങളുടെ കണ്ണില്‍ പെട്ടിരുന്നെങ്കില്‍ അയാളെ തീര്‍ക്കുമെന്ന് തീരുമാനിച്ചിരുന്നു. ഖമനയിക്കും ഇത് മനസിലായി. അതുകൊണ്ട് വളരെ ആഴത്തിലുള്ള ഭൂഗര്‍ഭ അറയില്‍ അദ്ദേഹം ഒളിച്ചു. ഇറാനിലെ കമാന്‍ഡര്‍മാരുമായുള്ള ആശയവിനിമയം പോലും ഖമനയി വിച്ഛേദിച്ചു. അതുകൊണ്ട് ആ പദ്ധതി നടപ്പിലായില്ല,' കാറ്റ്‌സ് പറഞ്ഞു.
ഇസ്രയേലിനൊപ്പം യുഎസും ഖമനയിയെ ഇല്ലാതാക്കുന്നതില്‍ അനുകൂല നിലപാട് സ്വീകരിച്ചിരുന്നു. 86 കാരനായ ഖമനയി ആക്രമണ സാധ്യത മുന്നില്‍കണ്ട് കുടുംബസമേതം ഭൂഗര്‍ഭ ബങ്കറില്‍ ഒളിക്കുകയായിരുന്നെന്നാണ് റിപ്പോര്‍ട്ട്. റവലൂഷണറി ഗാര്‍ഡ്‌സ് ആണ് ഖമനയിയ്ക്കും കുടുംബത്തിനും സുരക്ഷ ഒരുക്കിയത്.
