ഇത് മോദിയുടെ യുദ്ധമാണ്, റഷ്യയ്ക്ക് യുദ്ധം ചെയ്യാൻ പണം കൊടുക്കുന്നത് ഇന്ത്യ, ഗുരുതര ആരോപണവുമായി വൈറ്റ് ഹൗസ് ഉപദേഷ്ടാവ് പീറ്റർ നാവാറോ

റഷ്യയ്ക്ക് യുദ്ധം തുടരാനാവശ്യമായ പണം വ്യാപാരത്തിലൂടെ നല്‍കുന്നത് ഇന്ത്യയാണ്. ഇന്ത്യന്‍ നടപടികള്‍ അമേരിക്കന്‍ താത്പര്യങ്ങള്‍ക്ക് വിരുദ്ധമാണെന്നും പീറ്റര്‍ നവാറോ വ്യക്തമാക്കി.

അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് ഇന്ത്യയ്ക്കെതിരെ പ്രഖ്യാപിച്ച 50 ശതമാനം ടാരിഫ് നടപ്പിലായതിന് മണിക്കൂറുകള്‍ക്കുള്ളില്‍ ഇന്ത്യക്കെതിരെ രൂക്ഷ വിമര്‍ശനവുമായി  വൈറ്റ് ഹൗസ് വ്യാപാര ഉപദേഷ്ടാവായ പീറ്റര്‍ നാവാറോ. റഷ്യന്‍- യുക്രെയ്ന്‍ യുദ്ധം തുടരുന്നതിന്റെ പ്രധാനകാരണം റഷ്യയില്‍ നിന്നും വിലക്കുറഞ്ഞ ക്രൂഡോയില്‍ വാങ്ങുന്ന ഇന്ത്യയാണെന്നും ഇത് മോദിയുടെ യുദ്ധമാണെന്നും പീറ്റര്‍ നാവാറോ ആരോപിച്ചു. റഷ്യയ്ക്ക് യുദ്ധം തുടരാനാവശ്യമായ പണം വ്യാപാരത്തിലൂടെ നല്‍കുന്നത് ഇന്ത്യയാണ്. ഇന്ത്യന്‍ നടപടികള്‍ അമേരിക്കന്‍ താത്പര്യങ്ങള്‍ക്ക് വിരുദ്ധമാണെന്നും പീറ്റര്‍ നവാറോ വ്യക്തമാക്കി.

 അതേസമയം അമേരിക്ക ഏര്‍പ്പെടുത്തിയ 50 ശതമാനം തീരുവ അമേരിക്കയിലേക്ക് പോകുന്ന ടെക്‌സ്‌റ്റൈല്‍,ജ്വല്ലറി, തൊഴിലാളി അധിഷ്ഠിത മേഖലകള്‍,ഇലക്ട്രോണിക്‌സ്, ഫാര്‍മ മേഖലകളെയാകും പ്രധാനമായി ബാധിക്കുക. അതേസമയം വില കുറഞ്ഞ എണ്ണ ഇന്ത്യ വാങ്ങുന്നത് ആഭ്യന്തര വിപണിയെ നിയന്ത്രിക്കുന്നത് കൂടി ലക്ഷ്യമിട്ടാണെന്നും റഷ്യന്‍ എണ്ണ വാങ്ങുന്ന തീരുമാനത്തില്‍ നിന്നും പിന്നോട്ടില്ലെന്നുമാണ് ഇന്ത്യന്‍ നിലപാട്.ചൈനയും റഷ്യയില്‍ നിന്നും എണ്ണ വാങ്ങുന്നുണ്ടെങ്കിലും ഇന്ത്യക്കെതിരെയാണ് അമേരിക്ക കടുത്ത നടപടികള്‍ സ്വീകരിച്ചിരിക്കുന്നത്. ഇതോടെ മേഖലയില്‍ ചൈനയുമായുള്ള നയതന്ത്ര ബന്ധം മെച്ചപ്പെടുത്താനുള്ള ശ്രമത്തിലാണ് ഇന്ത്യ. അമേരിക്കന്‍ വിപണിക്ക് പകരം യൂറോപ്പില്‍ മെച്ചപ്പെട്ട വ്യാപാരബന്ധങ്ങള്‍ സ്ഥാപിക്കാനും ഇന്ത്യ ശ്രമിക്കുന്നുണ്ട്.