Mumbai Indians: പ്ലേ ഓഫില്‍ എത്തിയത് ശരി തന്നെ; പക്ഷേ ഒരു പ്രശ്‌നം ഉണ്ടല്ലോ !

ഗുജറാത്ത് ടൈറ്റന്‍സ്, പഞ്ചാബ് കിങ്‌സ്, റോയല്‍ ചലഞ്ചേഴ്‌സ് ബെംഗളൂരു എന്നീ ടീമുകളാണ് മുംബൈ ഇന്ത്യന്‍സിനൊപ്പം ഈ സീസണില്‍ പ്ലേ ഓഫില്‍ പ്രവേശിച്ചിരിക്കുന്നത്

Mumbai Indians: പ്ലേ ഓഫില്‍ കയറിയെങ്കിലും മുംബൈ ഇന്ത്യന്‍സ് ആരാധകര്‍ക്കു നെഞ്ചിടിപ്പ്. പ്ലേ ഓഫില്‍ കയറിയ മറ്റു മൂന്നു ടീമുകളെ ഈ സീസണില്‍ ഒരു തവണ പോലും തോല്‍പ്പിക്കാന്‍ മുംബൈയ്ക്ക് സാധിച്ചിട്ടില്ല. ഈ കണക്കുകള്‍ കുറച്ചൊന്നുമല്ല മുംബൈ ആരാധകരെ ഭയപ്പെടുത്തുന്നത്. 

ഗുജറാത്ത് ടൈറ്റന്‍സ്, പഞ്ചാബ് കിങ്‌സ്, റോയല്‍ ചലഞ്ചേഴ്‌സ് ബെംഗളൂരു എന്നീ ടീമുകളാണ് മുംബൈ ഇന്ത്യന്‍സിനൊപ്പം ഈ സീസണില്‍ പ്ലേ ഓഫില്‍ പ്രവേശിച്ചിരിക്കുന്നത്. ഈ മൂന്ന് ടീമുകളോടും ലീഗ് ഘട്ടത്തില്‍ മുംബൈ തോല്‍വി വഴങ്ങിയതാണ്.   

ഗുജറാത്ത് ടൈറ്റന്‍സിനോടു രണ്ട് തവണയും ബെംഗളൂരുവിനോടും പഞ്ചാബിനോടും ഓരോ തവണയുമാണ് മുംബൈ ഈ സീസണില്‍ തോറ്റത്. നാലാം സ്ഥാനക്കാരായി പ്ലേ ഓഫില്‍ എത്തിയിരിക്കുന്ന മുംബൈയ്ക്ക് എലിമിനേറ്ററില്‍ ബെംഗളൂരുവോ ഗുജറാത്തോ ആയിരിക്കും എതിരാളികള്‍. 

അതേസമയം ഈ സീസണില്‍ ആദ്യ അഞ്ച് മത്സരങ്ങളില്‍ നാലിലും തോറ്റ ശേഷമാണ് മുംബൈയുടെ പ്ലേ ഓഫ് എന്‍ട്രി. തുടക്കത്തിലെ പതര്‍ച്ചയ്ക്കു ശേഷം മികച്ച തിരിച്ചുവരവ് നടത്തിയ മുംബൈ പ്ലേ ഓഫില്‍ ഏത് കൊമ്പന്‍മാരെയും തോല്‍പ്പിക്കുമെന്നാണ് ആരാധകര്‍ പ്രതീക്ഷിക്കുന്നത്.