ഇന്ത്യൻ പ്രീമിയർ ലീഗിൽ ഗുജറാത്ത് ടൈറ്റൻസിനെ നേരിടാനൊരുങ്ങുന്ന രാജസ്ഥാൻ നായകൻ സഞ്ജു സാംസണെ കാത്ത് അപൂർവ നേട്ടം. ഐപിഎല്ലിൻ്റെ ആദ്യ രണ്ട് മത്സരങ്ങളിലും തിളങ്ങിയ സഞ്ജു തുടർന്നുള്ള രണ്ട് മത്സരങ്ങളിലും റൺസൊന്നും നേടാനാവാതെയാണ് മടങ്ങിയത്. ഇന്ന് ഗുജറാത്തിനെതിരെ രാജസ്ഥാൻ കളിക്കാനിറങ്ങുമ്പോൾ 2022ലെ ഐപിഎൽ ഫൈനലിലെ തോൽവിയ്ക്ക് പകരം വീട്ടാനാകും രാജസ്ഥാൻ ലക്ഷ്യമിടുന്നത്.
2 നേട്ടങ്ങളാണ് ഇന്ന് സഞ്ജുവിനെ കാത്തിരിക്കുന്നത്. ഇന്ന് നടക്കുന്ന മത്സരത്തിൽ 5 സിക്സുകൾ നേടാനായാൽ ടി20 ഫോർമാറ്റിൽ 250 സിക്സുകളെന്ന നേട്ടം താരത്തിന് സ്വന്തമാകും. മാത്രമല്ല ഇന്ന് 54 റൺസ് കൂടി നേടാനായാൽ രാജസ്ഥാൻ ജേഴ്സിയിൽ 3000 റൺസ് പൂർത്തിയാക്കുന്ന ആദ്യ താരമാകാനും സഞ്ജുവിനാകും.
