ഐപിഎല്ലിൽ മുൻ സീസണുകളിൽ വെടിക്കെട്ട് പ്രകടനം നടത്തി വിജയങ്ങൾ നേടിയിരുന്ന സുനിൽ നരൈൻ ഒരു പതിവ് കാഴ്‌ച്ചയായിരുന്നു. സ്പിൻ ബൗളിങ് താരമായിരുന്ന നരൈനെ ഓപ്പണറാക്കി ഇറക്കിയുള്ള പരീക്ഷണം കഴിഞ്ഞ സീസണുകളിൽ വിജയിച്ചുവെങ്കിലും ഈ സീസണിൽ ഇതുവരെയും പൂർണപരാജയമാണ്. രാജസ്ഥാൻ റോയൽസിനെതിരായ മൂന്നാം മത്സരത്തിലും ശുഭ്‌മാൻ ഗില്ലിനൊപ്പം സുനിൽ നരൈൻ തന്നെയാണ് ഓപ്പണറായി ഇറങ്ങിയത്.
14 പന്തിൽ വെറും 15 റൺസ് മാത്രമാണ് ഓപ്പണറായി താരം സ്വന്തമാക്കിയത്. രാഹുൽ തൃപാഠിയേയും ടോം ബാന്റണെയും പോലെയുള്ള പ്രതിഭാധനരായ ഓപ്പണിങ് ബാറ്റ്സ്മാൻ അവസരം കാത്തുനിൽക്കുമ്പോൾ നരൈനെ വീണ്ടും ഓപ്പണറാക്കി കളിപ്പിക്കുന്നതാണ് ഇപ്പോൾ കൊൽക്കത്ത ആരാധകരെ കലിപ്പിലാക്കിയിരിക്കുന്നത്. തുടരെ പരാജയപ്പെട്ടിട്ടും നരൈന് അവസരം നൽകുന്നതിനെതിരെയാണ് ആരാധക പ്രതിഷേധം. ബാറ്റിങ് മാത്രമാക്കണ്ട ബൗളിങ്ങും നരൈൻ തന്നെ ഓപ്പൺ ചെയ്യട്ടെയെന്നാണ് ആരാധക പ്രതികരണം.