കൊല്ലത്ത് കാണാതായ ആറുവയസുകാരിയെ ഇതുവരെ കണ്ടെത്താനാകാതെ വലഞ്ഞ് പൊലീസും നാട്ടുകാരും. രാവിലെ 10.30ഓടെയാണ് പുലിയില ഇളവൂർ തടത്തിൽമുക്ക് ധനേഷ് ഭവനത്തിൽ പ്രദീപിന്റെ മകൾ ദേവനന്ദയെ (പൊന്നു) കാണാതാകുന്നത്. സംഭവം നടക്കുമ്പോൾ അമ്മ ധന്യ മാത്രമേ വീട്ടിൽ ഉണ്ടായിരുന്നുള്ളു. പ്രദീപ് ഗൾഫിലാണ്.
ധന്യ തുണി കഴുകാൻ പോയപ്പോൾ അതുവരെ മുറ്റത്ത് കളിച്ച് കൊണ്ടിരിക്കുകയായിരുന്ന കുട്ടി അമ്മയ്ക്ക് പിന്നാലെ എത്തിയപ്പോൾ മകളോട് അകത്ത് പോയിരിക്കാൻ അമ്മ ആവശ്യപ്പെട്ടു. പൊന്നു അകത്തേക്ക് കയറി പോകുന്നത് കണ്ടതിനുശേഷമാണ് ധന്യ അലക്കാൻ പോയത്. എന്നാൽ തിരിച്ചെത്തിയപ്പോൾ ദേവനന്ദയെ കാണാനില്ല.
ഉടൻ തന്നെ സമീപത്തെല്ലാം അന്വേഷിച്ചു. അലക്കാൻ പോയ സമയത്ത് വീടിനു പുറത്ത് വാഹനങ്ങൾ വന്നതിന്റെയോ പോയതിന്റെ ശബ്ദം കേട്ടിട്ടില്ലെന്നാണ് ധന്യ മാധ്യമപ്രവർത്തകരോട് പറഞ്ഞത്. വീടിനു പുറത്തേക്കോ റോഡിലേക്കോ പുഴയിലേക്കോ സാധാരണഗതിയിൽ മകൾ പോകാറില്ലെന്നും ധന്യ കൂട്ടിച്ചേർത്തു.
കുട്ടിയെ ആരെങ്കിലും തട്ടിക്കൊണ്ട് പോയതാകാമെന്ന സംശയവും പൊലീസിനുണ്ട്. അഞ്ച് കിലോമീറ്റർ ചുറ്റളവിൽ സിസിടിവി ദൃശ്യങ്ങൾ ശേഖരിച്ച് വരികയാണ് പൊലീസ്. സമീപത്തെ പൊലീസ് സ്റ്റേഷനുകളിൽ വിവരം കൈമാറിയിട്ടുണ്ട്.
