കെട്ടിടങ്ങളും വീടുകളും വാടകയ്ക്ക് നല്‍കുമ്പോള്‍ ശ്രദ്ധിക്കുക; പുതിയ നിയമം അറിഞ്ഞിരിക്കണം
വീട്ടുടമസ്ഥര്‍ ജാഗ്രത പാലിക്കണമെന്ന് മലപ്പുറം അസിസ്റ്റന്റ് എക്‌സൈസ് കമ്മീഷണര്‍ ആര്‍ മനോജ് വ്യക്തമാക്കി.
ലഹരി വസ്തുക്കളുടെ ദുരുപയോഗത്തിനെതിരെയുള്ള പോരാട്ടത്തില്‍ എക്‌സൈസ് വകുപ്പിന്റെ പുതിയ ചുവടുവയ്പ്പ്. വാടക കെട്ടിടങ്ങളിലെ മയക്കുമരുന്ന് വ്യാപാരത്തെക്കുറിച്ചും അതിന്റെ ഉപയോഗത്തെക്കുറിച്ചും വീട്ടുടമസ്ഥര്‍ ജാഗ്രത പാലിക്കണമെന്ന് മലപ്പുറം അസിസ്റ്റന്റ് എക്‌സൈസ് കമ്മീഷണര്‍ ആര്‍ മനോജ് വ്യക്തമാക്കി. വാടക കെട്ടിടത്തില്‍ നിന്ന് മയക്കുമരുന്ന് പിടികൂടിയാല്‍ വീടിന്റെ ഉടമകളും ഉത്തരവാദികളാകും. വാടക നല്‍കുന്ന വ്യക്തികളുടെയും ഇടപാടുകളുടെയും അടിസ്ഥാനത്തില്‍ ഉടമകള്‍ക്ക് ബാധ്യതകള്‍ ഉണ്ടാകുമെന്ന മുന്നറിയിപ്പാണിത്.
കുടിയേറ്റക്കാരും ഇതര സംസ്ഥാന തൊഴിലാളികളും പ്രതികളാകുന്ന മയക്കുമരുന്ന് കേസുകള്‍ വര്‍ദ്ധിച്ചുവരുന്ന സാഹചര്യത്തില്‍ ശക്തമായ നടപടി സ്വീകരിച്ചുവരികയാണ്. മയക്കുമരുന്ന് ദുരുപയോഗത്തിനെതിരായ നിയമങ്ങളെയും ഉത്തരവാദിത്തങ്ങളെയും കുറിച്ച് വീട്ടുടമസ്ഥരെ ബോധവല്‍ക്കരിക്കുന്നതിന് പ്രത്യേക നടപടികള്‍ സ്വീകരിക്കുമെന്നും ആര്‍ മനോജ് അറിയിച്ചു. മയക്കുമരുന്ന് ഉപയോഗിക്കുന്നവരുടെ കോണ്‍ടാക്റ്റ് വിവരങ്ങള്‍ പങ്കുവെച്ച് സാമ്പത്തിക വളര്‍ച്ച നേടുന്നവരും നിരീക്ഷണത്തിലാണെന്നും അദ്ദേഹം വ്യക്തമാക്കി.
