ഏഷ്യാനെറ്റിന്റെ ബിഗ് ബോസ് റിയാലിറ്റി ഷോയ്‌ക്കിടയിൽ മത്സരാർഥിയായ രേഷ്‌മാ രാജന്റെ കണ്ണിൽ മറ്റൊരു മത്സരാർഥിയായ രജിത് കുമാർ മുളക് തേച്ചത് വലിയ വിവാദങ്ങൾക്ക് കാരണമായിരുന്നു. സംഭവത്തിന് പിന്നാലെ രജിത് കുമാറിനെ ബിഗ്‌ബോസ് ഷോയിൽ നിന്നും പുറത്തുപോവേണ്ടതായും വന്നു. ഇതോടെ രജിത് കുമാറിനെ താരപരിവേഷത്തോടെ കേരളം ഏറ്റെടുക്കുകയും അക്രമത്തിന് ഇരയായ രേഷ്‌മ രാജന് വില്ലത്തി പരിവേഷം ലഭിക്കുകയും ചെയ്‌തു. ഇപ്പോളിതാ ഇതേ സംഭവത്തിൽ രജിത് കുമാറിനെതിരെ കേസ് നൽകുവാൻ തീരുമാനിച്ചിരിക്കുകയാണ് ബിഗ് ബോസ് താരമായ രേഷ്‌മ രാജൻ.
ആദ്യം ഈ കേസുമായി മുന്നോട്ട് പോകേണ്ടതില്ല എന്നാണ് കരുതിയതെങ്കിലും വിവിധ പ്ലാറ്റ്ഫോമുകളില്‍ രജിത് കുമാര്‍ തെറ്റായ കാര്യങ്ങള്‍ പറഞ്ഞുകൊണ്ടേയിരുന്നു. അദ്ദേഹത്തിന്റെ ആരാധകരിൽ നിന്നും സംസ്‌കാരമില്ലാത്ത പ്രതികരണങ്ങൾ ഉണ്ടായി. താൻ നേരിടുന്ന ട്രോമ പോലും കണക്കിലെടുക്കാതെ മുളക് തേച്ച സംഭവം മാറ്റിപറയുന്ന രജിത് കുമാറിനെതിരെ പരാതി നൽകുകയാണെന്നാണ് രേഷ്‌മ പറയുന്നത്.
സംഭവം നടന്നതിന് ശേഷം അക്രമം ഏറ്റുവാങ്ങിയ തനിക്കെതിരെയാണ് സൈബർ ആക്രമണം ഉണ്ടായതെന്ന് രേഷ്‌മ പറയുന്നു. അറിയാതെയാണ് മുളക് തേച്ചതെന്ന് ആദ്യം പറഞ്ഞയാൾ പിന്നീട് ഞാൻ പ്രവോക് ചെയ്‌തത് കൊണ്ടാണത് നടന്നതെന്ന് പറഞ്ഞു. കവിളിൽ തേക്കുകയാണുണ്ടായതെന്ന് പറഞ്ഞു. ഞാൻ ഒരു പെണ്ണല്ലെ എനിക്ക് ഒന്നും ചെയ്യാൻ സാധിക്കില്ല എന്ന് കരുതിയാണ് ഇതെല്ലാം നടക്കുന്നത്. ഇത് വിക്‌ടിമിനെ അപമാനിക്കുന്നതാണ് അത് സഹിക്കാൻ കഴിയാത്തത് കൊണ്ടാണ് കേസ് കൊടുക്കുന്നത്- രേഷ്‌മ രാജൻ പറഞ്ഞു.
