മേയർ ബ്രോ ഇനി മുതൽ എംഎൽഎ ബ്രോ ! വട്ടിയൂർകാവ് നേടി എൽ‌ഡി‌എഫ്, ജാതി-മത സമവാക്യങ്ങളെ പൊളിച്ചെഴുതിയ ജനവിധി

ഏറെ ആകാംഷയോടെ കാത്തിരുന്ന ഉപതെരഞ്ഞെടുപ്പ് ഫലം പുറത്തുവരുമ്പോൾ കോൺഗ്രസിനെ ഞെട്ടിച്ച് വട്ടിയൂർക്കാവിലെ ഫലം പുറത്ത്. ഞെട്ടിക്കുന്ന വിജയം കരസ്ഥമാക്കി എൽ ഡി എഫ് സ്ഥാനാർത്ഥി വി കെ പ്രശാന്ത്. 14251 വോട്ടിന്റെ ശക്തമായ ജയമാണ് തിരുവനന്തപുരത്തിന്റെ ‘മേയർ ബ്രോ’ എന്ന പ്രശാന്തിനു വട്ടിയൂർക്കാവ് ജനങ്ങൾ സമ്മാനിച്ചത്. 

വട്ടിയൂര്‍ക്കാവിലേത് ജാതി-മത സമവാക്യങ്ങളെ പൊളിച്ചെഴുതുന്ന തിരഞ്ഞെടുപ്പ് ഫലമാണെന്ന് വി കെ പ്രശാന്ത് പറഞ്ഞത് സത്യമാണ്. മതവും ജാതിയുമല്ല, രാഷ്ട്രീയവും വികസനവുമാണ് വട്ടിയൂര്‍ക്കാവില്‍ എല്‍ഡിഎഫ് ചര്‍ച്ച ചെയ്തത്. അത് ജനങ്ങള്‍ സ്വീകരിച്ചു. അവർ അതിനനുസരിച്ച് വിധിയുമെഴുതി.

കഴിഞ്ഞ നിയമസഭാ തിരഞ്ഞെടുപ്പിലെയും രണ്ടു ലോക്സഭാ തിരഞ്ഞെടുപ്പിലെയും മൂന്നാം സ്ഥാനം എന്ന നാണക്കേടിന് അന്ത്യം കുറിച്ചിരിക്കുകയാണ് വി കെ പ്രശാന്ത്. ‘മേയർ ബ്രോ’ പരിവേഷത്തിൽ പ്രശാന്തിനു രാഷ്ട്രീയാതീത പിന്തുണ നേടാനായി എന്ന് തന്നെ കരുതാം.