ആരെല്ലാം പാർട്ടി വിട്ട് പോയാലും കോൺഗ്രസിന് ഒരു ചുക്കും സംഭവിക്കില്ലെന്ന് പ്രതിപക്ഷ നേതാവ് വിഡി സതീശൻ. പാർട്ടിയുടെ വലിയ നേതാവ് കെ കരുണാകരൻ പോയിട്ടും പാർട്ടി ശക്തമായി നിലനിന്നു. കോൺഗ്രസിനെ ഇല്ലായ്‌മ ചെയ്യാൻ കഴിയില്ല. അർഹിക്കുന്നതിനേക്കാൾ അംഗീകാരം കിട്ടിയവരാണ് എ‌‌കെ‌ജി സെന്ററിലേക്ക് പോയിരിക്കുന്നതെന്നും വിഡി സതീശൻ പറഞ്ഞു.
ആരെല്ലാം പോയാലും കോൺഗ്രസിന് ഒന്നും സംഭവിക്കില്ല. പുതിയൊരാൾ പകരക്കാരനെത്തും. കോൺഗ്രസ് പ്രസിഡന്റ് 14 ഡിസിസി പ്രസിഡന്റുമാരെ പ്രഖ്യാപിക്കുന്ന സമയത്ത് ദശാബ്‌ദങ്ങളായി പാർട്ടിക്ക് വേണ്ടി പ്രവർത്തിക്കുന്ന ഡിസിസി പ്രസിഡന്റുമാർ പെട്ടിതൂക്കികളാണെന്ന് ആക്ഷേപിക്കുന്നയാളെ പൂവിട്ട് പൂജിക്കണോ? സിപിഎം എറണാകുളം ജില്ലയിൽ 12 പേർക്കെതിരെ നടപടി എടുത്തിരുന്നു. ഒരു പാർട്ടിയാവുമ്പോൾ അതിന് അതിന്റേതായ ചട്ടക്കൂട് വേണം. ഇങ്ങനെയെല്ലാം അധിക്ഷേപിക്കുന്ന ആളെ ഏത് പാർട്ടിയാണ് വെച്ചുപൊറുപ്പിക്കുക.
സിപിഎം പാർട്ടി കൊണ്ടുപോകണമെങ്കിൽ അവിടെ പാർട്ടിയുടേതായ ചട്ടകൂട് വേണ്ടത് പോലെ കോൺഗ്രസിനകത്തും അങ്ങനെ വേണം. അതുപോലെയാണ് കോൺഗ്രസ് നടപടി എടുത്തത്. നമ്മുടെ പാർട്ടിയും കൊണ്ടുപോകേണ്ടെ, അവരുടെ പാർട്ടി മാത്രം മതിയോ സതീശൻ ചോദിച്ചു.
