സംസ്ഥാനത്ത് പനി ബാധിതരുടെ എണ്ണം ദിനംപ്രതി കൂടുകയാണ്. പകര്‍ച്ചപ്പനിക്കൊപ്പം ഡെങ്കിപ്പനി, എലിപ്പനി, മലേറിയ എന്നിവയും പടരുന്നുണ്ട്. അതീവ ജാഗ്രത പാലിക്കണമെന്ന് ആരോഗ്യവകുപ്പ് മുന്നറിയിപ്പ് നല്‍കുന്നു. ഇന്നലെ മാത്രം മലപ്പുറം ജില്ലയില്‍ രണ്ടായിരത്തിലേറെ പേര്‍ പനി ബാധിച്ച് ചികിത്സ തേടിയെന്നാണ് കണക്കുകള്‍. ഓരോ ജില്ലകളിലേയും ഇന്നലെത്തെ പനി ബാധിതരുടെ എണ്ണം നോക്കാം..
തിരുവനന്തപുരം - 1290
കൊല്ലം - 930
പത്തനംതിട്ട - 480
ഇടുക്കി - 409
കോട്ടയം - 830
ആലപ്പുഴ - 848
എറണാകുളം - 1216
തൃശൂര്‍ - 682
പാലക്കാട് - 913
മലപ്പുറം - 2051
കോഴിക്കോട് - 1542
വയനാട് - 615
കണ്ണൂര്‍ - 908
കാസര്‍ഗോഡ് - 695
പല തരത്തിലുള്ള പനികള്‍ പടരുന്നതിനാല്‍ പനി ലക്ഷണങ്ങള്‍ ഉള്ളവര്‍ വൈദ്യസഹായം ഉറപ്പാക്കണമെന്ന് ആരോഗ്യവകുപ്പ് പറഞ്ഞു. പനിക്ക് സ്വയം ചികിത്സ അരുതെന്നാണ് ആരോഗ്യവകുപ്പിന്റെ നിര്‍ദേശം. ഡെങ്കിപ്പനി, മലേറിയ തുടങ്ങിയവ ചികിത്സ വൈകിയാല്‍ മൂര്‍ച്ഛിക്കാന്‍ സാധ്യതയുണ്ട്. അതുകൊണ്ട് പനി ലക്ഷണങ്ങളുള്ളവര്‍ വൈദ്യസഹായം തേടണമെന്നാണ് ആരോഗ്യവകുപ്പിന്റെ മുന്നറിയിപ്പ്.
അതേസമയം സംസ്ഥാനത്ത് ഡെങ്കിപ്പനി വ്യാപനം രൂക്ഷമാകുകയാണ്. ജൂലൈ മാസം രോഗികളുടെ എണ്ണം വര്‍ധിച്ചേക്കുമെന്നാണ് ആരോഗ്യവകുപ്പിന്റെ മുന്നറിയിപ്പ്. ഡെങ്കിപ്പനി വ്യാപിച്ച സ്ഥലങ്ങളില്‍ ആരോഗ്യവകുപ്പ് കൂടുതല്‍ പരിശോധനകള്‍ നടത്തും. അതീവ ജാഗ്രത വേണമെന്ന് ആരോഗ്യമന്ത്രി വീണാ ജോര്‍ജ് പറഞ്ഞു.
