ആലപ്പുഴ കഞ്ഞിക്കുഴിയില്‍ പോലീസ് നടത്തിയ സിനിമാ സ്റ്റൈല് വാഹനപരിശോധനയ്ക്കിടെ ഉണ്ടായ അപകടത്തില്‍ രണ്ട് പേര്‍ മരിച്ച സംഭവത്തില്‍ എസ് ഐയ്ക്ക് സസ്പെന്‍ഷന്‍. കുത്തിയോട് എസ്‌ഐ എസ് സോമനെയാണ് സസ്‌പെന്റ് ചെയ്തത്.
നേരത്തെ എസ്‌ഐ പ്രഥമദൃഷ്ട്യാ തന്നെ കുറ്റക്കാരനെന്ന് ആലപ്പുഴ എസ്പിയുടെ റിപ്പോര്‍ട്ട് നല്‍കിയിരുന്നു. ഇയാൾക്കെതിരെ വകുപ്പു തല അന്വേഷണത്തിനും ഉത്തരവിട്ടിട്ടുണ്ട്. തുടരന്വേഷണം നടത്തി ആവശ്യമെങ്കിൽ കൂടുതൽ നടപടി സ്വീകരിക്കുമെന്നും എസ് പി അറിയിച്ചു.
പോലീസ് നടത്തിയ വാഹനപരിശോധനയെ തുടര്‍ന്ന് ബൈക്കുകള്‍ തമ്മില്‍ കൂട്ടിമുട്ടി കഞ്ഞിക്കുഴി പഞ്ചായത്തിലെ കൂത്തക്കര വീട്ടില്‍ ഷേബുവിന്റെ ഭാര്യ സുമി (35)യും, പാതിരപ്പള്ളി വെളിയില്‍ ബാലന്റെ മകന്‍ ബിച്ചു (24) ആണ് മരിച്ചത്.
പൊലീസ് കൈ കാണിച്ചിട്ടും നിർത്താതെ പോയെന്ന് ആരോപിച്ചു ഷേബുവും കുടുംബവും സഞ്ചരിച്ച ബൈക്കിനു കുറുകെ പൊലീസ് ജീപ്പ് നിർത്തുകയായിരുന്നു. ഈ സമയം എതിരെ വന്ന വിച്ചുവിന്റെ ബൈക്ക് ഷേബുവിന്റെ ബൈക്കില്‍ ഇടിച്ചാണ് അപകടമുണ്ടായത്. ബിച്ചു സംഭവസ്ഥലത്ത് തന്നെ വെച്ച് മരിച്ചു. കഴിഞ്ഞ 11നായിരുന്നു അപകടം.