തൃശ്ശൂരിൽ എൻഡിഎ സ്ഥാനാർത്ഥിയായ സുരേഷ് ഗോപിക്ക് വേണ്ടി വോട്ട് തേടി യുവനടി പ്രിയാ വാര്യരും. തൃശ്ശൂർ ലുലു കൺവൻഷൻ സെന്ററിൽ വെച്ച് നടന്ന സുരേഷ് ഗോപിയോടൊപ്പം ഒരു സായാഹ്നം എന്ന പരിപാടിയിൽ പങ്കെടുത്താണ് പ്രിയാ വാര്യർ സുരേഷ് ഗോപിക്ക് പിന്തുണ അറിയിച്ചത്.
സുരേഷ് ഗോപിക്ക് വേണ്ടി വോട്ട് തേടിയതിന് പിന്നാലെ നടി പ്രിയാ വാര്യരുടെ ഫേസ്ബുക്ക് പേജിലും രൂക്ഷ വിമർശനം. ചാണക മലരുകൾ പൂക്കം എന്ന് കരുതുന്നുണ്ടെങ്കിൽ നിനക്ക് തെറ്റി, വർഗ്ഗീയത അത് കേരളം വെച്ച് പൊറുപ്പിക്കില്ല. അതിനു നീയല്ല ഷിറ്റ് ഗോപിയും മേനോനും വിചാരിച്ചാലും, ജസ്റ്റ് റിമമ്പർ ദാറ്റ്, ചാണക സംഘിയാണോ, അറിയാൻ വൈകി എന്നിങ്ങനെയാണ് കമന്റുകൾ.
നേരത്തെ ശബരിമല സ്ത്രീ പ്രവേശന വിഷയത്തിലും ബിജെപി അനുകൂല നിലപാടുകളായിരുന്നു പ്രിയാ വാര്യർ സ്വീകരിച്ചിരുന്നത്. ശബരിമലയിൽ പോകുന്ന സ്ത്രീകൾക്ക് 41 ദിവസം ശുദ്ധിയോടെ ഇരിക്കാൻ കഴിയില്ലെന്നും ക്ഷേത്രത്തിലെ ആചാരങ്ങൾ ഏറെ വർഷങ്ങൾ പഴക്കമുള്ളതാണെന്നുമായിരുന്നു അന്ന് ഒരു അഭിമുഖത്തിൽ പ്രിയാ വാര്യർ വ്യക്തമാക്കിയത്.
ഇതിനു പിന്നാലെയാണ് എൻഡിഎ സ്ഥാനാർത്ഥിക്ക് പിന്തുണയുമായി പ്രിയ പൊതു പരിപാടിയിലെത്തിയത്. നടൻ ബിജു മേനോനും നിർമ്മാതാവ് സുരേഷ് കുമാറുമടക്കം നിരവധി ചലച്ചിത്ര പ്രവർത്തകരും സുരേഷ് ഗോപിക്ക് പിന്തുണയുമായി പരിപാടിയിൽ പങ്കെടുത്തിരുന്നു.