തലതൊട്ടപ്പന്മാർ കൈയ്യൊഴിഞ്ഞപ്പോൾ ബൽറാമിന് കൂട്ട് യൂത്തന്മാർ!
ആദ്യം കോടിയേരി മാപ്പ് പറയട്ടെ, എന്നിട്ടാകം ബൽറാമിനെക്കൊണ്ട് മാപ്പ് പറയിക്കുന്നത്: ബൽറാമിന് പിന്തുണയുമായി യൂത്ത് കോൺഗ്രസ്
Publish Date: Sun, 07 Jan 2018 (15:15 IST)
Updated Date: Sun, 07 Jan 2018 (15:16 IST)
എകെജിക്കെതിരെ വിവാദ പരാമര്ശം നടത്തിയ വിടി ബല്റാം എംഎൽഎയെ പിന്തുണച്ച് യൂത്ത് കോണ്ഗ്രസ് രംഗത്ത്. നെഹ്റു കുടുംബത്തെ അധിക്ഷേപിച്ച സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന് ആദ്യം മാപ്പുപറയട്ടെയെന്ന് യൂത്ത് കോണ്ഗ്രസ് സംസ്ഥാന അധ്യക്ഷന് ഡീന് കുര്യാക്കാസ് വ്യക്തമാക്കി.
ആദ്യം കോടിയേരി മാപ്പ് പറയട്ടേ, എന്നിട്ടാകാം വിടി ബല്റാമിനെ കൊണ്ട് മാപ്പ് പറയിപ്പിക്കുന്നതെന്ന് ഡീൻ കുര്യാക്കോസ് വ്യക്തമാക്കി. നെഹ്റു കുടുംബത്തിനെതിരെ അങ്ങേയറ്റത്തെ സ്ത്രീവിരുദ്ധത പറഞ്ഞ കോടിയേരിയോടുള്ള നിലപാട് സിപിഎം വ്യക്തമാക്കണമെന്നും ഡീന് പറഞ്ഞു.
കോണ്ഗ്രസിലെ നേതാക്കള് ഓരോരുത്തരായി ബല്റാമിനെ തള്ളിപ്പറഞ്ഞ സാഹചര്യത്തിലാണ് യൂത്ത് കോണ്ഗ്രസ് പിന്തുണ നൽകുന്നതെന്നതും ശ്രദ്ധേയമാണ്. ബൽറാം നടത്തിയ പരാമർശം തെറ്റായി പോയെന്ന് വ്യക്തമാക്കി ഉമ്മൻചാണ്ടിയും എം എം ഹസനും കെ മുരളീധരനും രംഗത്തെത്തിയിരുന്നു.
