നൂഡില്‍സ് പാക്കറ്റില്‍ കാന്‍സര്‍ മുന്നറിയിപ്പ്, വൈറലായി വീഡിയോ
മുന്നറിയിപ്പ്: കാന്‍സറും പ്രത്യുല്‍പാദന ദോഷവും' എന്ന് എഴുതിയ ഒരു മുന്നറിയിപ്പ് ലേബല്‍ ഒരു റാമെന്‍ നൂഡില്‍സ് പാക്കറ്റിന്റെ പിന്നില്‍ അച്ചടിച്ചിരിക്കുന്നത്
ഒറ്റയ്ക്ക് താമസിക്കുന്നവര്‍ക്കും ജോലിക്ക് പോകുന്നവര്‍ക്കും വളരെ പെട്ടെന്ന് കഴിക്കാവുന്ന ഒരു ലഘുഭക്ഷണമാണ് റാമെന്‍ നൂഡില്‍സ്. എന്നാല്‍ ഇപ്പോള്‍ സോഷ്യല്‍ മീഡിയയില്‍ വൈറലാകുന്ന ഒരു വീഡിയോ റാമെന്‍ നൂഡില്‍സ് ആരാധകരെ ഞെട്ടിച്ചിരിക്കുകയാണ്. മുന്നറിയിപ്പ്: കാന്‍സറും പ്രത്യുല്‍പാദന ദോഷവും' എന്ന് എഴുതിയ ഒരു മുന്നറിയിപ്പ് ലേബല്‍ ഒരു റാമെന്‍ നൂഡില്‍സ് പാക്കറ്റിന്റെ പിന്നില്‍ അച്ചടിച്ചിരിക്കുന്നത് വീഡിയോയില്‍ കാണാം. സോഷ്യല്‍ മീഡിയ പ്ലാറ്റ്ഫോമില്‍ 'omggotworms' എന്ന് വിളിക്കുന്ന ഉപയോക്താവാണ് ഇന്‍സ്റ്റാഗ്രാമില്‍ വീഡിയോ പങ്കിട്ടത്.
വീഡിയോയില്‍, ചെറിയ ഫോണ്ടില്‍ അച്ചടിച്ചിരിക്കുന്ന ചെറിയ ജാഗ്രതാ അറിയിപ്പ് വെളിപ്പെടുത്താന്‍ അയാള്‍ നിരവധി റാമെന്‍ പാക്കറ്റുകള്‍ കാണിക്കുന്നുണ്ട്. 'കാത്തിരിക്കൂ... റാമെന്‍ നൂഡില്‍സില്‍ ഈ മുന്നറിയിപ്പുണ്ടോ? കാന്‍സര്‍ + പ്രത്യുല്‍പാദനപരമായ ദോഷം?? ലേബലുകള്‍ ശ്രദ്ധാപൂര്‍വ്വം വായിക്കുക,' എന്നാണ് ഇന്‍സ്റ്റാഗ്രാമര്‍ പോസ്റ്റിന്റെ അടിക്കുറിപ്പില്‍ എഴുതിയിരിക്കുന്നത്.
ഈ വീഡിയോ വളരെ പെട്ടെന്ന് തന്നെ നിരവധി സോഷ്യല്‍ മീഡിയ ഉപയോക്താക്കളുടെ ശ്രദ്ധ പിടിച്ചുപറ്റി. ഇത് പല ഉപഭോക്താക്കളെയും ഞെട്ടിക്കുകയും ആശയക്കുഴപ്പത്തിലാക്കുകയും ചെയ്തു. ചില ഉപയോക്താക്കള്‍ വീഡിയോയെ കണ്ണുതുറപ്പിക്കുന്ന ഒരു വീഡിയോ എന്ന് വിശേഷിപ്പിച്ചപ്പോള്‍, മറ്റു ചിലര്‍ നൂഡില്‍സും സമാനമായ സംസ്‌കരിച്ച ഭക്ഷണങ്ങളുമായി ബന്ധപ്പെട്ട ആരോഗ്യപരമായ അപകടസാധ്യതകളെക്കുറിച്ച് ആശങ്ക പ്രകടിപ്പിച്ചു.
