ഭക്തരേ... നിങ്ങളുടെ യജമാനൻ പൊള്ളയായ വാഗ്ദാനങ്ങൾ മാത്രമാണു നൽകുന്നത്; മോദിക്കെതിരെ പരിഹാസവുമായി രാഹുൽ
ഭക്തരേ, മോദിയുടെ വാഗ്ദാനങ്ങൾ പൊള്ളയാണ്; പരിഹാസവുമായി രാഹുൽ
കേന്ദ്ര സർക്കാരിനും പ്രധാനമന്ത്രി നരേന്ദ്ര മോദിക്കുമെതിരെ രൂക്ഷ വിമർശനവുമായി കോണ്ഗ്രസ് അധ്യക്ഷൻ രാഹുൽ ഗാന്ധി. പൊള്ളയായ വാഗ്ദാനങ്ങൾ മാത്രമാണ് മോദി നൽകുന്നതെന്നും വാഗ്ദാനങ്ങളൊന്നും ഇതുവരെ നിറവേറ്റപ്പെട്ടിട്ടില്ലെന്നും രാഹുൽ കുറ്റപ്പെടുത്തി.
9,860 കോടി രൂപയാണ് സ്മാർട്ട് സിറ്റി പദ്ധതികൾക്കായി കേന്ദ്രസർക്കാർ മാറ്റിവച്ചത്. എന്നാൽ 60 നഗരങ്ങളിലായി വെറും 645 കോടി രൂപ മാത്രമാണ് സർക്കാർ ചെലവഴിച്ചത്. അനുവദിച്ച തുകയുടെ എഴ് ശതമാനം മാത്രമാണ് ഇതെന്നും രാഹുൽ വ്യക്തമാക്കി.
രാജ്യത്തിന്റെ പ്രധാന എതിരാളികളായി കണക്കാക്കുന്ന ചൈന, നമ്മളെ പല മത്സരങ്ങളിലും പിന്തള്ളിക്കൊണ്ടിരിക്കുമ്പോളും നിങ്ങളുടെ യജമാനൻ പൊള്ളയായ വാഗ്ദാനങ്ങൾ മാത്രമാണു നൽകുന്നതെന്നും മോദി ഭക്തർക്കായി ട്വിറ്ററിൽ എഴുതിയ കുറിപ്പിൽ രാഹുൽ പരിഹസിച്ചു.
