തമിഴ്‌നാട്ടിൽ വിഷമദ്യ ദുരന്തം, 2 ജില്ലകളിലായി 11 മരണം: 2 പേർ അറസ്റ്റിൽ

തമിഴ്‌നാട്ടിലെ രണ്ട് ജില്ലകളിലായുണ്ടായ വിഷമദ്യ ദുരന്തങ്ങളിൽ പെട്ട് 11 പേർ മരിച്ചു. വില്ലുപുരം ജില്ലയിലെ എക്കിയാർകുപ്പത്തുണ്ടായ വിഷമദ്യ ദുരന്തത്തിൽ 7 പേരും ചെങ്കൽപ്പേട്ട് ജില്ലയിലുണ്ടായ വിഷമദ്യ ദുരന്തത്തിൽ നാലുപേരുമാണ് മരിച്ചത്. മുപ്പതോളം പേർ സംഭവത്തെ തുടർന്ന് ആശുപത്രിയിൽ ചികിത്സയിലാണ്. മരിച്ചവരിൽ ഒരു സ്ത്രീയും ഉൾപ്പെടുന്നു.

മലർവിഴി(60),ശങ്കർ(55),ധരണിവേൽ(50),സുരേഷ്(65),രാജമൂർത്തി(55) എന്നിവരാണ് വില്ലുപുരത്ത് മരിച്ചത്. കേസുമായി ബന്ധപ്പെട്ട് 2 പേർ അറസ്റ്റിലായി. കൂടാതെ ഇൻസ്പക്ടർമാരും സബ് ഇൻസ്പെക്ടർമാരുമായി ഏഴ് പോലീസുകാരെ സസ്പെൻഡ് ചെയ്യുകയും ചെയ്തു, മത്സ്യബന്ധനത്തൊഴിലാളികളാണ് മദ്യദുരന്തത്തിൽ മരിച്ചവരിൽ ഏറെയും. മെഥനോൾ,രാസവസ്തുക്കൾ എന്നിവ ചേർത്തതാണ് മരണകാരണമെന്ന് ഉദ്യോഗസ്ഥർ പറയുന്നു. 200 മില്ലിയുടെ മദ്യപാക്കറ്റ് ഇവിടെ 30 രൂപയ്ക്കാണ് വിറ്റിരുന്നത്.