അപകടത്തെ തുടര്‍ന്ന് ജോലിക്ക് പോകാന്‍ സാധിക്കാത്തതിന്റെ നിരാശയില്‍ ടെക്കി ആത്മഹത്യ ചെയ്തു. അമേരിക്കയില്‍ ജോലി ചെയ്‌തിരുന്ന കെ രവികുമാര്‍ (42) എന്നയാളാണ് സെക്കന്തരാബാദിലെ മൂന്നുനില അപ്പാര്‍ട്ട്‌മെന്റില്‍ നിന്ന് ചാടി മരിച്ചത്. ഞായറാഴ്ച വൈകിട്ട് 3.45 ഓടെയാണ് സംഭവം.
2004ല്‍ അപകടത്തില്‍ പെട്ടതോടെ ജോലി ചെയ്യാന്‍ കഴിയാതെ വന്നതോടെ സോഫ്ട്‌വേര്‍ എന്‍ജിനിയറായ രവികുമാര്‍ അമേരിക്കയില്‍ നിന്നും ഇന്ത്യയിലേക്ക് തിരിച്ചെത്തിയത്. ജോലി നഷ്‌ടമായതിന്റെയും ആരോഗ്യം മോശമായതിന്റെയും പിന്നാലെ ഇയാള്‍ കടുത്ത മാനസിക സംഘര്‍ഷത്തിന് അടിമയായി തീര്‍ന്നിരുന്നു.
ഒരു ഷോപ്പില്‍ ജോലി ചെയ്‌തിരുന്ന ഭാര്യയുമായി രവികുമാര്‍ ഞായറാഴ്ച വഴക്കിട്ടിരുന്നു. അവധി ദിവസവും ജോലിക്ക് പോകുന്നതിനെ ചൊല്ലിയായിരുന്നു തര്‍ക്കം.
എതിര്‍പ്പ് അവഗണിച്ച് ഭാര്യ ജോലിക്ക് പോയതിന്റെ നിരാശയില്‍ ജനാലവഴി രവികുമാര്‍ പുറത്തേക്ക് ചാടുകയായിരുന്നു. തലയ്ക്കും കൈകാലുകള്‍ക്കും ഗുരുതരമായി പരുക്കേറ്റ ഇയാളെ ഉടന്‍ തന്നെ ആശുപത്രിയില്‍ എത്തിച്ചെങ്കിലും രക്ഷിക്കാന്‍ സാധിച്ചില്ല.
രവികുമാര്‍ ഫ്ലാറ്റില്‍ നിന്നും താഴേക്ക് ചാടാന്‍ ശ്രമിക്കുന്നതിന്റെയും അപകടത്തിന്റെയും ദൃശ്യങ്ങള്‍ സമീപവാസികള്‍ മൊബൈലില്‍ പകര്‍ത്തിയിട്ടുണ്ട്. നിരാശയെ തുടര്‍ന്നുള്ള ആത്മഹത്യയാണെന്നാണ് പൊലീസിന്റെ പ്രാഥമിക റിപ്പോര്‍ട്ട്. രവികുമാര്‍ പതിവായി വഴക്കിടാറുണ്ടെന്ന് ഭാര്യ വ്യക്തമാക്കി.