മുസ്ലിങ്ങള് പഞ്ചറൊട്ടിക്കുന്നവര്; മോദിയുടെ വര്ഗീയ പരാമര്ശത്തില് വിമര്ശനം ശക്തം
കഴിഞ്ഞദിവസം ഹരിയാനയിലെ ഹിസാറില് നടന്ന പൊതു പരിപാടിയാണ് പ്രധാനമന്ത്രി വിവാദ പരാമര്ശം നടത്തിയത്.
Publish Date: Tue, 15 Apr 2025 (15:46 IST)
Updated Date: Tue, 15 Apr 2025 (16:00 IST)
മുസ്ലീങ്ങള് പഞ്ചറൊട്ടിക്കുന്നവരെന്ന പ്രധാനമന്ത്രി നരേന്ദ്രമോദിയുടെ പരാമര്ശത്തില് വിമര്ശനവുമായി പ്രതിപക്ഷ പാര്ട്ടികള്. ഇത്തരം പരാമര്ശങ്ങള് പ്രധാനമന്ത്രിക്ക് യോജിച്ചതല്ലെന്ന് കോണ്ഗ്രസ് എംപി ഇമ്രാന് പ്രതാപ് ഗാര്ഗില് പറഞ്ഞു. കഴിഞ്ഞദിവസം ഹരിയാനയിലെ ഹിസാറില് നടന്ന പൊതു പരിപാടിയാണ് പ്രധാനമന്ത്രി വിവാദ പരാമര്ശം നടത്തിയത്. വഖഫ് സ്വത്തുക്കള് സത്യസന്ധമായി ഉപയോഗിച്ചിരുന്നെങ്കില് മുസ്ലിം യുവാക്കള്ക്ക് സൈക്കിള് പഞ്ചറുകള് നന്നാക്കി ഉപജീവനമാര്ഗം കണ്ടെത്തേണ്ടി വരില്ലായിരുന്നു എന്നാണ് മോദി പറഞ്ഞത്.
വഖഫ് സ്വത്തുക്കളില് പ്രയോജനം ഉണ്ടാക്കിയത് ഭൂമാഫിയകളാണെന്നും ഈ മാഫിയ ദളിത് പിന്നാക്ക, വിധവകള് എന്നിവരുടെ ഭൂമി കൊള്ളയടിക്കുകയായിരുന്നുവെന്നും പ്രധാനമന്ത്രി പറഞ്ഞു. പുതിയ വഖഫ് നിയമപ്രകാരം ഏതെങ്കിലും ആദിവാസിയുടെ ഉടമസ്ഥതയിലുള്ള ഭൂമിയോ സ്വത്തോ സ്വന്തമാക്കാന് കഴിയില്ല. പാവപ്പെട്ട മുസ്ലീങ്ങള്ക്ക് അവരുടെ അവകാശങ്ങള് ലഭിക്കും. ഇതാണ് യഥാര്ത്ഥ സാമൂഹികനീതി എന്ന് നരേന്ദ്രമോദി പറഞ്ഞിരുന്നു.
അതേസമയം ആര്എസ്എസ് അതിന്റെ വിഭവങ്ങള് രാജ്യ താത്പര്യത്തിനായി ഉപയോഗിച്ചിരുന്നു എങ്കില് പ്രധാനമന്ത്രിക്ക് കുട്ടിക്കാലത്ത് ചായ അടിക്കേണ്ടി വരില്ലായിരുന്നുവെന്ന് അസറുദ്ദീന് ഉവൈസി പരിഹസിച്ചു.
