വയനാട്ടില്‍ രാഹുല്‍ മത്സരിക്കുമോയെന്ന കാര്യത്തിൽ ഇപ്പോഴും അന്തിമ തീരുമാനമായിട്ടില്ല. ഇക്കാര്യത്തിൽ നാഷണൽ കോൺഗ്രസ് കനത്ത ആലോചനയിലാണ്. എന്നാൽ, രാഹുൽ ഗാന്ധി വയനാട്ടിൽ മത്സരിക്കാൻ സമ്മതം മൂളുമെന്ന പ്രതീക്ഷയിലാണ് കേരളത്തിലെ ഓരോ കോൺഗ്രസ് പ്രവർത്തകരും.
അതേസമയം അമേഠിയില്‍ തോറ്റ് തുന്നം പാടുമെന്ന ഭയമാണ് രാഹുല്‍ വയനാട്ടില്‍ ഒരുങ്ങുന്നതെന്നാണ് ബിജെപി ഉയര്‍ത്തുന്ന വിമര്‍ശനം. അമേഠിയില്‍ രാഹുലിന്‍റെ ശത്രുവായ ബിജെപി നേതാവ് സ്മൃതിയും രാഹുലിനെതിരെ കടുത്ത വിമര്‍ശനമാണ് ഉയര്‍ത്തിയത്. തോല്‍വി ഭയന്നാണ് രാഹുല്‍ വയനാട്ടില്‍ മത്സരിക്കുന്നതെങ്കില്‍ വയനാട്ടിലും രാഹുലിനെ പറപ്പിക്കാന്‍ സാക്ഷാല്‍ സ്മൃതി ഇറാനി തന്നെ ബിജെപി സ്ഥാനാര്‍ത്ഥിയായി എത്തുമെന്നാണ് റിപ്പോര്‍ട്ട്. മാതൃഭൂമിയാണ് വാര്‍ത്ത പുറത്തുവിട്ടത്.
വയനാട്ടിൽ രാഹുൽ മത്സരിക്കണമെന്ന ആവശ്യം ഇവിടെയുള്ള നേതാക്കൾ തന്നെയാണ് ഉയർത്തിയത്. ഇതേ ആവശ്യം തന്നെയാണ് കർണാടകയിലുള്ള കോൺഗ്രസ് നേതാക്കളും ഉന്നയിക്കുന്നത്. കേരളത്തിന് പുറമെ കര്‍ണാടകത്തിലും രാഹുല്‍ ഗാന്ധി മത്സരിക്കണമെന്ന ആവശ്യം അവിടുത്തെ നേതാക്കളും ഉയര്‍ത്തുന്നുണ്ട്. രാഹുൽ വയനാടിന് പകരം കർണാടക തിരഞ്ഞെടുക്കുമോ? അമേഠിയിൽ മാത്രം മത്സരിക്കാമെന്ന് ഉറപ്പിക്കുമോ? എന്നെല്ലാം കാത്തിരുന്ന് കാണാം.
