‘ഇത്രയും കാലം ഉറങ്ങികിടന്നവരാണ് ഇപ്പോള്‍ പാര്‍ട്ടിയുണ്ടാക്കാന്‍ വന്നിരിക്കുന്നത്‘; രജനിയുടെയും കമലിന്റെയും രാഷ്ട്രീയ പ്രവേശനത്തെ പരിഹസിച്ച് വിജയകാന്തിന്റെ ഭാര്യ
രജനിയുടെയും കമലിന്റെയും രാഷ്ട്രീയ പ്രവേശനത്തെ വിമര്‍ശിച്ച് വിജയകാന്തിന്റെ ഭാര്യ
രജനികാന്തിന്റെയും കമലഹാസന്റെയും രാഷ്ട്രീയ പ്രവേശനത്തെ പരിഹസിച്ച് ഡിഎംഡികെയുടെ തലവനും നടനുമായ വിജയകാന്തിന്റെ ഭാര്യ പ്രേമലത. ഇത്രയും കാലം ഉറങ്ങിക്കിടന്നവരാണ് ഇപ്പോള്‍ രാഷ്ട്രീയത്തില്‍ ഇറങ്ങാന്‍ നോക്കുന്നതെന്നും പുതിയ പാര്‍ട്ടിയുണ്ടാക്കുന്നതെന്നും അവര്‍ പറഞ്ഞു.
പേര് എടുത്ത് പറയാതെയായിരുന്നു പ്രേമലതയുടെ വിമര്‍ശനം. തന്റെ ഭര്‍ത്താവിന്റെ പാര്‍ട്ടിയായ ഡിഎംഡികെ കര്‍ഷകര്‍ക്കും സാധാരണക്കാര്‍ക്കും വേണ്ടി എന്നും പോരാടുകയാണ്. തന്റെ ഭര്‍ത്താവിന് ഇന്നും ജനഹൃദയങ്ങളില്‍ സ്ഥാനമുണ്ടെന്നും പ്രേമലത പറഞ്ഞു .
അതേസമയം രജനികാന്തിന്റെയും കമലഹാസന്റെയും രാഷ്ട്രീയപ്രവേശനത്തെ സംബന്ധിച്ച് നിലപാട് വ്യക്തമാക്കി എ ആര്‍ റഹ്മാനും രംഗത്തെത്തിയിരുന്നു. സംസ്ഥാനത്ത് മികച്ച നേതൃത്വം വേണമെന്ന തോന്നലുണ്ടായതു കൊണ്ടാണ് രജനിയും കമലും രാഷ്ട്രീയത്തിലേക്കിറങ്ങുന്നതെന്നും ആരു രാഷ്ട്രീയത്തില്‍ പ്രവേശിച്ചാലും അവരുടെ ലക്ഷ്യം ജനസേവനമായിരിക്കണമെന്നും അദ്ദേഹം വ്യക്തമാക്കിയിരുന്നു.
