ജന്തർമന്തറിൽ സമരം നടത്തുന്ന ഗുസ്തി താരങ്ങൾക്ക് നേരെ ഡൽഹി പോലീസ് നടത്തിയ അതിക്രമത്തിൽ നെഞ്ചുതകർന്ന് ഗുസ്തി താരം വിനേഷ് ഫോഗട്ട്. ഇതെല്ലാം കാണാനാണോ ഞങ്ങൾ മെഡലുകൾ നേടിയതെന്ന് വിനേഷ് ഫോഗാട്ട് മാധ്യമങ്ങളോട് ചോദിച്ചു. ഇന്നലെ രാത്രിയാണ് സമരക്കാർക്ക് നേരെ ഡൽഹി പോലീസ് അതിക്രമം നടത്തിയത്.
ഞങ്ങളാരും ക്രിമിനലുകളല്ല. എന്നോട് പോലീസ് മോശമായി പെരുമാറുകയും പിടിച്ചുതള്ളുകയും ചെയ്തു.വനിതാ പോലീസുകാരെല്ലാം എവിടെയായിരുന്നു. മാധ്യമങ്ങൾക്ക് മുൻപിൽ കണ്ണീരൊഴുക്കി കൊണ്ട് വിനേഷ് ഫോഗാട്ട് ചോദിച്ചു. പോലീസ് അതിക്രമത്തിൻ്റെ പശ്ചാത്തലത്തിൽ തനിക്ക് ലഭിച്ച മെഡലുകൾ സർക്കാർ തിരിച്ചെടുക്കണമെന്ന് ബജ്റംഗ് പുനിയ പ്രതികരിച്ചു. തങ്ങൾക്ക് രാജ്യത്തെ മുഴുവൻ ജനങ്ങളുടെയും പിന്തുണ ആവശ്യമുണ്ട്. പോലീസ് തങ്ങളെ അധിക്ഷേപിക്കുകയും തങ്ങൾക്ക് നേരെ ബലം പ്രയോഗിക്കുകയും ചെയ്യുന്നു. അതേസമയം അവർ ബ്രിജ് ഭൂഷൺ സിംഗിനെതിരെ ഒരു നടപടിയും കൈക്കോല്ലുന്നില്ലെന്നും ബജ്റംഗ് പുനിയ ആരോപിച്ചു.
