നാവുപിഴച്ചതാണ്; നടൻ ഇന്ദ്രൻസിനെതിരെയുള്ള പ്രസ്താവനയിൽ മാപ്പു പറഞ്ഞ് സനൽകുമാർ ശശിധരൻ

സംസ്ഥാന ചലചിത്ര അവാർഡുകളിൽ മികച്ച നടനുള്ള പുരസ്കാരം നേടിയ ഇന്ദ്രൻസിനെതിരെ നടത്തിയ പ്രസ്താവന നാവുപിഴയാണെന്ന് സനൽകുമാർ ശശിധരൻ. കഴിഞ്ഞ ദിവസം റിപ്പോർട്ടർ ചാനലിനു നൽകിയ അഭിമുഖത്തിൽ നടനെതിരെ വിവാദ പരാമർശവുമായി സനൽകുമാർ രംഗത്തു വന്നിരുന്നു. 

'ഇന്ദ്രന്‍സേട്ടന് കഴിഞ്ഞ തവണയൊക്കെ അവാര്‍ഡ് കിട്ടാന്‍ അര്‍ഹതയുണ്ടായിരുന്നു ഇത്തവണ  ആക്ഷേപങ്ങളുയരാതിരിക്കാന്‍ അദ്ദേഹത്തെ കരുവാക്കുകയായിരുന്നു' എന്നതായിരുന്നു ചാനലിനു നൽകിയ അഭിമുഖത്തിൽ സനൽകുമാറിന്റെ വാക്കുകൾ 

ഇതിനെ തുടർന്ന് സനൽകുമാർ ശശിധരൻ ഇന്ദ്രൻസ് എന്ന നടനെ അവഹേളിക്കുന്ന  പ്രസ്താവനയാണ് ചാനലിൽ  നടത്തിയത് എന്ന് ആളൊരുക്കത്തിന്റെ സംവിധായകൻ വി സി അഭിലാഷ് ഫേസ്ബുക്കിൽ കൂറിച്ചിരുന്നു. ഇതിനു പിന്നാലെയാണ് സനൽകുമാർ ശശിധരൻ ഖേദപ്രകടനവുമായി രംഗത്ത് വന്നത്. 

‘റിപ്പോര്‍ട്ടര്‍ ചാനലിലെ ക്‌ളോസ് എന്‍കൗണ്ടറില്‍ ഇന്ദ്രന്‍സേട്ടന് കഴിഞ്ഞ തവണയൊക്കെ അവാര്‍ഡ് കിട്ടാന്‍ അര്‍ഹതയുണ്ടായിരുന്നെന്നും ഇത്തവണ അദ്ദേഹത്തെ ആക്ഷേപങ്ങളുയരാതിരിക്കാന്‍ കരുവാക്കുകയായിരുന്നു എന്നും ഉദ്ദേശിച്ച് ഒരു വാചകം പറഞ്ഞിരുന്നു. ഒരിക്കലും അത് അദ്ദേഹത്തിന്റെ അവാര്‍ഡിന്റെ മഹത്വം കുറച്ചുകാണാനോ ഒരു കലാകാരനെന്ന നിലക്ക് അദ്ദേഹത്തെ ഇടിച്ചുതാഴ്ത്താനോ ഉദ്ദേശിച്ച് പറഞ്ഞതല്ല.. നാവുപിഴയാണ്. അദ്ദേഹത്തെപ്പോലെ ഒരു നല്ല മനുഷ്യന് ഇന്‍ഡസ്ട്രിയില്‍ തന്നെ അപൂര്‍വമാണ്.. നിരുപാധികം ക്ഷമ ചോദിക്കുന്നു.’ എന്നാണ് സനൽകുമാർ ഫേസ്ബുക്ക് പോസ്റ്റിലൂടെ പ്രദികരിച്ചത്.