'മഞ്ഞുമ്മല്‍ ബോയ്സ്' സംവിധായകന്റെ അടുത്ത പടം ദിലീപിനൊപ്പം, അര്‍ജുന്‍ അശോകനും മംമ്ത മോഹന്‍ദാസും ടീമില്‍, പുതിയ വിവരങ്ങള്‍

2024 വലിയ പ്രതീക്ഷയോടെയാണ് ദിലീപ് നോക്കിക്കാണുന്നത്. തുടര്‍ പരാജയങ്ങളിലും നടന്‍ വീണിട്ടില്ല. പ്രേക്ഷകരെ തൃപ്തിപ്പെടുത്തുന്ന തരത്തിലുള്ള സിനിമകള്‍ ചെയ്യാനുള്ള ശ്രമത്തിലാണ് ജനപ്രിയ നായകന്‍. അതിനായുള്ള ചര്‍ച്ചകള്‍ ആരംഭിച്ചുകഴിഞ്ഞു. പുറത്തുവരുന്ന റിപ്പോര്‍ട്ടുകള്‍ അനുസരിച്ച് മഞ്ഞുമ്മല്‍ ബോയ്സ് ചിദംബരത്തെ സമീപിച്ചിരിക്കുകയാണ് ദിലീപ്. അടുത്ത സിനിമ വിജയിച്ചു നില്‍ക്കുന്ന സംവിധായകനൊപ്പം ചെയ്യാനാണ് നടന്‍ ആഗ്രഹിക്കുന്നത്. വരാനിരിക്കുന്ന സിനിമയെ കുറിച്ച് കൂടുതല്‍ അറിയാം. 

ദിലീപിന്റെ സിനിമ പതിവുപോലെതന്നെ കോമഡി എന്റര്‍ടൈനറാണ്. കുടുംബ പ്രേക്ഷകരെ തൃപ്തിപ്പെടുത്തുന്ന കഥയായിരിക്കും ഒരുങ്ങുന്നത്. യുവ താരങ്ങളില്‍ ഏറ്റവും തിരക്കുള്ള അര്‍ജുന്‍ അശോകനെ കൂടി ദിലീപ് ടീമില്‍ എത്തിച്ചു. തീര്‍ന്നില്ല ദിലീപ്-മംമ്ത മോഹന്‍ദാസ് കോമ്പോ ഒരിക്കല്‍ കൂടി പ്രേക്ഷകരുടെ മുന്നിലേക്ക് എത്തുന്നു. 

ചിദംബരം സംവിധാനം ചെയ്യുന്ന സിനിമയുടെ കഥ ഒരുക്കുന്നത് ഗണപതിയും ചിദംബരവും ചേര്‍ന്നാണ്. ദിലീപ്, അര്‍ജുന്‍ അശോകന്‍, മംത മോഹന്‍ദാസ് എന്നിവരാണ് പ്രധാന താരങ്ങള്‍. പ്രേക്ഷകര്‍ക്ക് ചിരിക്കാനുള്ള എല്ലാ ഘടകങ്ങളും സിനിമയിലുണ്ടാകും. ഔദ്യോഗിക പ്രഖ്യാപനം ജൂലൈ നാലിന് എത്തുമെന്നാണ് റിപ്പോര്‍ട്ട്.