വിജയ് സേതുപതിയും വിക്രമും അല്ല, അല്ലു അർജുന്‍റെ വില്ലനാകാൻ ആര്യ ?

അല്ലു അർജുൻ-രശ്മിക മന്ദാന ഒന്നിക്കുന്ന 'പുഷ്പ'യ്ക്കായി കാത്തിരിക്കുകയാണ് ആരാധകർ. ഇപ്പോഴിതാ സിനിമാപ്രേമികൾക്ക് ഒരു സന്തോഷ വാർത്തയാണ് ടോളിവുഡിൽ നിന്ന് ലഭിക്കുന്നത്. അല്ലു അർജുൻറെ വില്ലനാകാൻ ആര്യ എത്തുന്നു എന്നാണ് പുതിയ റിപ്പോർട്ടുകൾ. ഈ റോളിലേക്ക് നേരത്തെയും ആര്യയുടെ പേര് ഉയർന്നുവന്നിരുന്നു.

വിജയ് സേതുപതിയും ചിയാൻ വിക്രമും ഈ ചിത്രത്തിൽ വില്ലനാകാൻ എത്തുന്നുണ്ടെന്നാണ് നേരത്തെ റിപ്പോർട്ടുകൾ ഉണ്ടായിരുന്നത്. ഇപ്പോഴിതാ ഈ പേരുകളെല്ലാം തള്ളിക്കൊണ്ട് ആര്യ അല്ലു അർജുൻറെ വില്ലനാകാൻ ഒരുങ്ങുന്നു എന്നാണ് കേൾക്കുന്നത്. അങ്ങനെയാണെങ്കിൽ വർഷങ്ങൾക്കുശേഷം ടോളിവുഡിലേക്ക് ആര്യയുടെ തിരിച്ചുവരവിന് ഈ ചിത്രം വഴിയൊരുക്കും. അതേസമയം ചിത്രത്തിൻറെ ഷൂട്ടിംഗ് പുരോഗമിക്കുകയാണ്.

ഒരു ലോറി ഡ്രൈവറിന്റെ വേഷത്തിലാണ് അല്ലു അർജുൻ എത്തുന്നത്. സുകുമാർ സംവിധാനം ചെയ്യുന്ന ചിത്രത്തിൽ പ്രകാശ് രാജ്, ജഗപതി ബാബു, ധനഞ്ജയ്, അനസൂയ എന്നിവരാണ് മറ്റു വേഷങ്ങളിലെത്തുന്നത്. അടുത്തിടെ പുറത്തുവന്ന ഫസ്റ്റ് ലുക്കിൽ അല്ലു അർജുൻ താടി നീട്ടി വളർത്തി കലിപ്പ് ലുക്കിൽ ആയിരുന്നു പ്രത്യക്ഷപ്പെട്ടത്.