ഇന്ത്യന്‍ ക്രിക്കറ്റ് ടീമിന്റെ സ്‌പോണ്‍സര്‍മാരായി കഴിഞ്ഞാല്‍ പിന്നെ വെച്ചടി താഴേക്കിറക്കമാണെന്നാണ് ക്രിക്കറ്റ് ലോകത്ത് നിന്നുള്ള സംസാരം. സഹാറ മുതല്‍ ബൈജൂസ് വരെ നീളുന്ന സ്‌പോണ്‍സര്‍മാര്‍ക്കെല്ലാം പണികിട്ടിയത് ഇന്ത്യന്‍ ക്രിക്കറ്റ് ടീമിന്റെ സ്‌പോണ്‍സര്‍മാരായതിന് ശേഷമായിരുന്നു. ഏറ്റവുമൊടുവില്‍ ഇന്ത്യന്‍ ടീം സ്‌പോണ്‍സര്‍മാരായ ഡ്രീം ഇലവനും എട്ടിന്റെ പണി കിട്ടിയിരിക്കുകയാണ്. ഇക്കഴിഞ്ഞ മണ്‍സൂണ്‍ സെഷനില്‍ പാര്‍ലമെന്റ് പാസാക്കിയ പുതിയ ഓണ്‍ലൈന്‍ ഗെയിമിങ് ബില്ലാണ് ഡ്രീം ഇലവന് ത്രിച്ചടിയായത്.
നിയമപ്രകാരം പണം നല്‍കി കളിക്കുന്ന എല്ലാ ഓണ്‍ലൈന്‍ ഗെയിമുകളും നിരോധിക്കാനാണ് തീരുമാനമായത്. ബില്‍ പാസായതിന് പിന്നാലെ തന്നെ പണം നല്‍കുന്ന റിയല്‍- മണി ഗെയിമിംഗ് താത്കാലികമായി നിര്‍ത്തിവെയ്ക്കുകയാണെന്ന് ഡ്രീം ഇലവന് അറിയിച്ചു. ഉപഭോക്താക്കളുടെ അക്കൗണ്ടിലുള്ള പണം സുരക്ഷിതമാണെന്നും അവര്‍ക്ക് ഏത് നിമിഷവും പണം പിന്‍വലിക്കാമെന്ന ഉറപ്പാണ് കമ്പനി നല്‍കിയിരിക്കുന്നത്. ഡ്രീം ഇലവന് പുറമെ വിന്‍സോ ഗെയിം, മൈ 11 സര്‍ക്കിള്‍, ഖേലോ ഫാന്റസി, പോക്കര്‍ ബാസി, റമ്മി, പറിമാച്ച് തുടങ്ങിയ പ്ലാറ്റ്‌ഫോമുകളും ഇതോടെ പ്രവര്‍ത്തനം നിര്‍ത്തേണ്ടതായി വരും.
കൃത്യമായ പരിശോധനകളില്‍ ഇത്തരം പ്ലാറ്റ്‌ഫോമുകളില്‍ നടക്കുന്നില്ലെന്നും സാമ്പത്തിക തട്ടിപ്പുകളും കള്ളപ്പണം വെളുപ്പിക്കുന്നതുമടക്കം പല കാര്യങ്ങളും ഇത്തരം ആപ്പുകള്‍ വഴി നടക്കുന്നുണ്ടെന്നാണ് സര്‍ക്കാര്‍ വ്യക്തമാക്കുന്നത്. കൂടാതെ ഇത്തരം ആപ്പുകള്‍ ഉണ്ടാക്കുന്ന അഡിക്ഷന്‍ മൂലം പലരും പണം നഷ്ടപ്പെടുത്തി ആത്മഹത്യ ചെയ്യുന്നതും പുതിയ നിയമ രൂപീകരണത്തിന് കാരണമായിട്ടുണ്ട്.
