അണ്ടര്‍ 19 വനിതാ ടി20 ലോകകപ്പില്‍ സ്‌കോട്ട്ലന്‍ഡിനെ 150 റണ്‍സിന് തകര്‍ത്ത് സെമി ഫൈനല്‍ ഉറപ്പിച്ച് ഇന്ത്യ. ആദ്യം ബാറ്റ് ചെയ്ത ഇന്ത്യ ഓപ്പണര്‍ ഗോണ്‍ഗാഡി തൃഷയുടെ സെഞ്ചുറി കരുത്തില്‍ 20 ഓവറില്‍ ഒരു വിക്കറ്റ് നഷ്ടത്തില്‍ 208 റണ്‍സടിച്ചപ്പോള്‍ സ്‌കോട്ട്ലന്‍ഡ് 14 ഓവറില്‍ 58 റണ്‍സിന് പുറത്തായി.
53 പന്തില്‍ നിന്നാണ് തൃഷയുടെ സെഞ്ചുറിപ്രകടനം. ഇതോടെ അണ്ടര്‍ 19 ടി20 ലോകകപ്പില്‍ സെഞ്ചുറി നേടുന്ന ആദ്യതാരമെന്ന റെക്കോര്‍ഡും താരം സ്വന്തമാക്കി. 59 പന്തില്‍ 110 റണ്‍സുമായി താരം പുറത്താകാതെ നിന്നു. ബൗളിംഗിനെത്തിയപ്പോള്‍ രണ്ടോവറില്‍ നിന്നും 6 റണ്‍സ് മാത്രം വഴങ്ങി 3 വിക്കറ്റുകള്‍ നേടാനും തൃഷയ്ക്ക് സാധിച്ചു. ടോസ് നഷ്ടമായി ആദ്യം ബാറ്റ് ചെയ്ത ഇന്ത്യയ്ക്കായി തൃഷയും കമാലിനിയും ചേര്‍ന്ന ഓപ്പണിംഗ് വിക്കറ്റില്‍ 13.3 ഓവറില്‍ 147 റണ്‍സ് കൂട്ടിച്ചേര്‍ത്താണ് വേര്‍പിരിഞ്ഞത്. 13 ഫോറും 4 സിക്‌സും അടങ്ങുന്നതായിരുന്നു തൃഷയുടെ ഇന്നിങ്ങ്‌സ്. 41 പന്തില്‍ 51 റണ്‍സാണ് കമാലിനി എടുത്തത്. ഇന്ത്യയ്ക്കായി ആയുഷി ശുക്ല മൂന്നോവറില്‍ 8 റണ്‍സിന് 4 വിക്കറ്റെടുത്തപ്പോള്‍ വൈഷ്ണവി ശര്‍മ 5 റണ്‍സിന് 3 വിക്കറ്റും തൃഷ 6 റണ്‍സിന് 3 വിക്കറ്റും വീഴ്ത്തി.
