Jasprit Bumrah: ഓസ്‌ട്രേലിയയില്‍ പോയി മാസ് കാണിച്ച ഞാനല്ലാതെ വേറാര് ! ഒന്നാം സ്ഥാനം തിരിച്ചുപിടിച്ച് ബുംറ
ഒന്നാം സ്ഥാനത്തുള്ള ബുംറയ്ക്ക് 883 റാങ്കിങ് പോയിന്റ്‌സ് ആണുള്ളത്
Jasprit Bumrah: ഐസിസി ടെസ്റ്റ് ബൗളിങ് റാങ്കിങ്ങില്‍ ഒന്നാം സ്ഥാനം തിരിച്ചുപിടിച്ച് ജസ്പ്രിത് ബുംറ. പെര്‍ത്ത് ടെസ്റ്റിലെ മികച്ച പ്രകടനത്തിനു പിന്നാലെയാണ് ബുംറ ഒന്നാം സ്ഥാനത്തേക്ക് തിരിച്ചെത്തിയത്. ദക്ഷിണാഫ്രിക്കന്‍ താരം കഗിസോ റബാദ, ഓസ്‌ട്രേലിയന്‍ താരം ജോഷ് ഹെസല്‍വുഡ് എന്നിവരെ പിന്തള്ളിയാണ് ബുംറയുടെ മുന്നേറ്റം.
ഒന്നാം സ്ഥാനത്തുള്ള ബുംറയ്ക്ക് 883 റാങ്കിങ് പോയിന്റ്‌സ് ആണുള്ളത്. ടെസ്റ്റ് കരിയറില്‍ ബുംറയ്ക്കു ലഭിക്കുന്ന ഏറ്റവും ഉയര്‍ന്ന റാങ്കിങ് പോയിന്റ് ആണിത്. രണ്ടാം സ്ഥാനത്തുള്ള റബാദയ്ക്ക് 872 റാങ്കിങ് പോയിന്റാണുള്ളത്. ഹെസല്‍വുഡ് (860), രവിചന്ദ്രന്‍ അശ്വിന്‍ (807), പ്രഭാത് ജയസൂര്യ (801) എന്നിവരാണ് യഥാക്രമം മൂന്ന് മുതല്‍ അഞ്ച് വരെയുള്ള സ്ഥാനങ്ങളില്‍.
ഇന്ത്യന്‍ താരങ്ങളായ രവീന്ദ്ര ജഡേജ ഏഴാം സ്ഥാനത്തും കുല്‍ദീപ് യാദവ് 18-ാം സ്ഥാനത്തും ഉണ്ട്. മുഹമ്മദ് സിറാജ് മൂന്ന് സ്ഥാനങ്ങള്‍ മെച്ചപ്പെടുത്തി 25-ാം റാങ്കില്‍ എത്തി.
പെര്‍ത്ത് ടെസ്റ്റില്‍ രണ്ട് ഇന്നിങ്‌സുകളിലുമായി എട്ട് വിക്കറ്റാണ് ബുംറ വീഴ്ത്തിയത്. മുഹമ്മദ് സിറാജ് പെര്‍ത്തില്‍ അഞ്ച് വിക്കറ്റെടുത്തിരുന്നു.
