India vs England, 3rd T20 Scorecard: നിരാശപ്പെടുത്തി സഞ്ജുവും സൂര്യയും; രാജ്‌കോട്ടില്‍ ഇന്ത്യക്ക് തോല്‍വി
അഞ്ച് മത്സരങ്ങളുടെ പരമ്പര ഇതോടെ 2-1 എന്ന നിലയിലായി. ആദ്യ രണ്ട് മത്സരങ്ങളിലും ഇന്ത്യക്കായിരുന്നു ജയം
India vs England, 3rd T20 Scorecard: ഇംഗ്ലണ്ടിനെതിരായ മൂന്നാം ട്വന്റി 20 യില്‍ ഇന്ത്യക്ക് തോല്‍വി. രാജ്‌കോട്ടില്‍ നടന്ന മത്സരത്തില്‍ 26 റണ്‍സിനാണ് ഇന്ത്യ കീഴടങ്ങിയത്. ടോസ് നഷ്ടപ്പെട്ടു ആദ്യം ബാറ്റ് ചെയ്ത ഇംഗ്ലണ്ട് നിശ്ചിത 20 ഓവറില്‍ ഒന്‍പത് വിക്കറ്റ് നഷ്ടത്തില്‍ 171 റണ്‍സ് നേടി. മറുപടി ബാറ്റിങ്ങില്‍ ഇന്ത്യക്ക് 20 ഓവറില്‍ ഒന്‍പത് വിക്കറ്റ് നഷ്ടപ്പെടുത്തി 145 റണ്‍സെടുക്കാനേ സാധിച്ചുള്ളൂ. അഞ്ച് മത്സരങ്ങളുടെ പരമ്പര ഇതോടെ 2-1 എന്ന നിലയിലായി. ആദ്യ രണ്ട് മത്സരങ്ങളിലും ഇന്ത്യക്കായിരുന്നു ജയം.
രാജ്‌കോട്ടില്‍ മലയാളി താരം സഞ്ജു സാംസണും ഇന്ത്യന്‍ നായകന്‍ സൂര്യകുമാര്‍ യാദവും നിരാശപ്പെടുത്തി. സഞ്ജു ആറ് പന്തില്‍ മൂന്ന് റണ്‍സെടുത്ത് പുറത്തായപ്പോള്‍ സൂര്യകുമാറിന് നേടാനായത് ഏഴ് പന്തില്‍ 14 റണ്‍സ്. 35 പന്തില്‍ 40 റണ്‍സെടുത്ത ഹാര്‍ദിക് പാണ്ഡ്യയാണ് ഇന്ത്യയുടെ ടോപ് സ്‌കോറര്‍. അഭിഷേക് ശര്‍മ 14 പന്തില്‍ 24 റണ്‍സ് നേടി. രണ്ടാം ട്വന്റി 20 യില്‍ ഇന്ത്യയെ വിജയത്തിലെത്തിച്ച തിലക് വര്‍മയ്ക്ക് 14 പന്തില്‍ 18 റണ്‍സെടുക്കാനേ സാധിച്ചുള്ളൂ.
ഇംഗ്ലണ്ടിനായി ജാമി ഓവര്‍ടണ്‍ നാല് ഓവറില്‍ 24 റണ്‍സ് വഴങ്ങി മൂന്ന് വിക്കറ്റ് വീഴ്ത്തി. ബ്രണ്ടന്‍ കാഴ്‌സും ജോഫ്ര ആര്‍ച്ചറും രണ്ട് വീതം വിക്കറ്റുകള്‍ സ്വന്തമാക്കി. മാര്‍ക്ക് വുഡിനും ആദില്‍ റഷീദിനും ഓരോ വിക്കറ്റ്.
ഓപ്പണര്‍ ബെന്‍ ഡക്കറ്റ് (28 പന്തില്‍ 51) ഇംഗ്ലണ്ടിനായി അര്‍ധ സെഞ്ചുറി നേടി. ലിയാം ലിവിങ്സ്റ്റണ്‍ 24 പന്തില്‍ 43 റണ്‍സെടുത്തു. ഇന്ത്യക്കായി വരുണ്‍ ചക്രവര്‍ത്തി നാല് ഓവറില്‍ 24 റണ്‍സ് മാത്രം വഴങ്ങി അഞ്ച് വിക്കറ്റ് വീഴ്ത്തി. ഹാര്‍ദിക് പാണ്ഡ്യക്ക് രണ്ട് വിക്കറ്റ്. ഏകദിന ലോകകപ്പിനു ശേഷം ഇന്ത്യന്‍ ടീമിലേക്ക് തിരിച്ചെത്തിയ മുഹമ്മദ് ഷമി മൂന്ന് ഓവര്‍ എറിഞ്ഞെങ്കിലും വിക്കറ്റൊന്നും വീഴ്ത്തിയില്ല. രവി ബിഷ്ണോയിയും അക്സര്‍ പട്ടേലും ഓരോ വിക്കറ്റുകള്‍ സ്വന്തമാക്കി.
