ഐപിഎല്ലിൽ ലഖ്നൗ സൂപ്പർ ജെയൻ്സിനെ നേരിടാനൊരുങ്ങുകയാണ് സഞ്ജു സാംസണിൻ്റെ നേതൃത്വത്തിലുള്ള രാജസ്ഥാൻ റോയൽസ്. പോയൻ്റ് പട്ടികയിലെ ആദ്യ സ്ഥാനങ്ങളിലുള്ള ഇരു ടീമുകളും തമ്മിലുള്ള മത്സരം രാജസ്ഥാൻ്റെ ഹോം ഗ്രൗണ്ടായ സവായ് മാൻസിംഗിലാണ് നടക്കുന്നത്. ഇപ്പോഴിതാ മത്സരത്തിന് തൊട്ട് മുൻപ് രാജസ്ഥാൻ ലഖ്നൗ നായകന്മാരെ താരതമ്യം ചെയ്തിരിക്കുകയാണ് മുൻ ഇന്ത്യൻ ഓപ്പണറായ വിരേന്ദർ സെവാഗ്.
സഞ്ജുവിനേക്കാൾ മികച്ച ക്രിക്കറ്ററാണ് കെ എൽ രാഹുലെന്ന് സെവാഗ് പറയുന്നു. ഇന്ത്യൻ ടീമിൽ സ്ഥാനമുറപ്പിക്കുന്നതിനെ പറ്റിയാണ് പറയുന്നതെങ്കിൽ ഞാൻ വിശ്വസിക്കുന്നത് സഞ്ജുവിനേക്കാൾ മികച്ച താരം കെ എൽ രാഹുൽ ആണെന്നാണ്. ടെസ്റ്റ് ഫോർമാറ്റിലും ഇന്ത്യയ്ക്കായി കളിക്കുന്ന താരമാണ് രാഹുൽ. വിദേശ പിച്ചുകളിൽ സെഞ്ചുറി നേടാനും രാഹുലിനായിട്ടുണ്ട്.
ഏകദിനത്തിൽ ഓപ്പണറായും മധ്യനിരതാരമായും മികച്ച പ്രകടനം പുറത്തെടുക്കാൻ രാഹുലിന് സാധിക്കുന്നു. ടി20യിലും രാഹുൽ മോശമാണെന്ന് പറയാനാകില്ല. കഴിഞ്ഞ മത്സരത്തിൽ രാഹുൽ നന്നായി ബാറ്റ് ചെയ്തു. സ്ട്രൈക്ക്റേറ്റ് കുറവാണെങ്കിൽ കൂടി ഫോമിൻ്റെ ലക്ഷണങ്ങൾ രാഹുൽ കാണിച്ചു. രാജസ്ഥാൻ നിരയിൽ ട്രെൻ്റ് ബോൾട്ട് ഒഴികെ മികച്ച പേസർമാരില്ല. രാഹുൽ ക്രീസിൽ നിൽക്കുകയാണെങ്കിൽ രാജസ്ഥാനെതിരെ മികച്ച സ്കോർ നേടാൻ ലഖ്നൗവിന് സാധിക്കും. സെവാഗ് പറഞ്ഞു.
