ഇംഗ്ലണ്ടിനെതിരായ ടെസ്റ്റ് പരമ്പരയുടെ ആദ്യ മത്സരത്തിനുമുമ്പ് ഇന്ത്യയുടെ ടീമില്‍ അപ്രതീക്ഷിതമായി തിരെഞ്ഞെടുക്കപ്പെട്ട പേസര്‍ ഹര്‍ഷിത് റാണയെ തിരിച്ചയച്ചു. പ്രത്യേക സാഹചര്യത്തിലാണ് ഇംഗ്ലണ്ടിലുണ്ടായിരുന്ന പേസറെ ടീമില്‍ ഉള്‍പ്പെടുത്തിയതെന്ന് ബിസിസിഐ വിശദീകരിച്ചു.
ടീമിലെ പ്രധാനപേസര്‍മാരില്‍ ഒരാള്‍ക്ക് ചെറിയ പരിക്കുണ്ടായിരുന്നു. ഇംഗ്ലണ്ടിലെ ബൗണ്‍സുള്ള പിച്ചില്‍ ഹര്‍ഷിത് അനുയോജ്യനായിരുന്നു. അതിനാലാണ് ടീമില്‍ ബാക്കപ്പ് എന്ന നിലയില്‍ ഉള്‍പ്പെടുത്തിയതെന്ന് ബിസിസിഐയോട് അടുത്ത വൃത്തം പറഞ്ഞതായി IANS റിപ്പോര്‍ട്ട് ചെയ്തു. പരിക്കിലായിരുന്ന പേസറുടെ സ്ഥിതി മെച്ചപ്പെട്ടതോടെയാണ് ഹര്‍ഷിതിനെ തിരിച്ചയക്കുന്നതും ബിസിസിഐ വ്യക്തമാക്കി. നേരത്തെ ഇംഗ്ലണ്ട് ലയണ്‍സിനെതിരെ പരിശീലന മത്സരത്തില്‍ മോശം പ്രകടനം നടത്തിയ ഹര്‍ഷിതിനെ സീനിയര്‍ ടീമില്‍ ഉള്‍പ്പെടുത്തിയത് വിവാദമായി മാറിയിരുന്നു. ഐപിഎല്ലില്‍ കൊല്‍ക്കത്ത നൈറ്റ് റൈഡേഴ്‌സ് പരിശീലകനായിരുന്ന ഗംഭീര്‍ കൊല്‍ക്കത്തയിലെ ശിഷ്യനായ ഹര്‍ഷിതിനെ പരിധിവിട്ട് സഹായിക്കുന്നുവെന്നായിരുന്നു വിമര്‍ശനം.
