ഇംഗ്ലണ്ടിനെതിരായ ടി20 പരമ്പരയിലെ ആദ്യ രണ്ട് മത്സരങ്ങളിൽ വിശ്രമം അനുവദിച്ച രോഹിത് ശർമ ചൊവ്വാഴ്‌ച്ച ഇംഗ്ലണ്ടിനെതിരെ നടക്കുന്ന മൂന്നാം മത്സരത്തിൽ കളിച്ചേക്കുമെന്ന് റിപ്പോർട്ട്. രോഹിത്ത് തിരിച്ചുവരുന്നതോടെ ആദ്യ രണ്ട് മത്സരങ്ങളിൽ പരാജയപ്പെട്ട കെഎൽ രാഹുലിന് അവസരം നഷ്ടപ്പെട്ടേക്കും.
നിലവില്‍ പരമ്പരയില്‍ ഇന്ത്യന്‍ ഇന്നിംഗ്‌സ് ഓപ്പണ്‍ ചെയ്യുന്ന കെ.എല്‍ രാഹുല്‍ രണ്ട് മത്സരങ്ങളിലും പരാജയമായിരുന്നു. ശിഖർ ധവാന് പകരമെത്തിയ ഇഷാൻ കിഷൻ തന്റെ ആദ്യ മത്സരത്തിൽ മികച്ച പ്രകടനം പുറത്തെടുത്തതിനാൽ മൂന്നാം മത്സരത്തിലും ഇഷാനെ നിലനിര്‍ത്തുമെന്ന് ഉറപ്പാണ്. ഇതോടെ രോഹിത്തിന്റെ തിരിച്ചുവരവ് ഭീഷണിയാവുക കെഎൽ രാഹുലിനാവും.
അതേസമയം രാഹുലിന് ഒരു അവസരം കൂടി നല്‍കാന്‍ തീരുമാനിച്ചാല്‍ രോഹിത്തിന് നാലാം മത്സരത്തിനായി കാക്കേണ്ടി വരും.ചൊവ്വാഴ്ച വൈകിട്ട് 7 ന് മൊട്ടേര സ്‌റ്റേഡിയത്തിലാണ് പരമ്പരയിലെ മൂന്നാം മത്സരം.
