രണ്ടാം ഏകദിനത്തില്‍ ഓസ്‌ട്രേലിയയ്ക്ക് എതിരെ ഇന്ത്യയ്ക്ക് 50 റണ്‍സിന് ജയം. ടോസ് നേടി ആദ്യം ബാറ്റ് ചെയ്ത ഇന്ത്യ 252 റണ്‍സാണ് അടിച്ചത്. വിജയലക്ഷ്യം തേടിയിറങ്ങിയ ഓസ്‌ട്രേലിയ 43.1 ഓവറില്‍ 200 റണ്‍സിന് പുറത്തായി. നേരത്തെ ചെന്നൈയില്‍ നടന്ന ആദ്യ ഏകദിനത്തിലും ഇന്ത്യ ഓസ്ടട്രേലിയയെ തോല്‍പ്പിച്ചിരുന്നു.
ഓസ്‌ട്രേലിയന്‍ ഓപ്പണര്‍മാരായ ഡേവിഡ് വാര്‍ണറെയും ഹില്‍ട്ടന്‍ കാര്‍ട്ട്‌റൈറ്റിനെയും വരച്ച വരയില്‍ നിര്‍ത്തിയതാണ് ഇന്ത്യയെ ജയിപ്പിക്കന്‍ കാരണമായത്. ജസ്പ്രീത് ഭുമ്രയും ഭുവനേശ്വര്‍ കുമാറും ഒന്നിനൊന്ന് മികച്ച് പന്തെറിഞ്ഞെങ്കിലും വിക്കറ്റ് ഭാഗ്യം തുണച്ചത് ഭുവനേശ്വറിനെ. 6.1 ഓവറില്‍ രണ്ട് മെയ്ഡന്‍ അടക്കം വെറും 9 റണ്‍സ് മാത്രം വഴങ്ങി ഭുവി 3 വിക്കറ്റ് വീഴ്ത്തി. ഹാട്രിക് വിക്കറ്റ് വീഴ്ത്തിയ കുല്‍ദീപ് യാദവ് തന്നെയാണ് ഇന്ത്യന്‍ ബൗളര്‍മാരിലെ താരമായത്.