കൊച്ചിയിൽ ഭാര്യയുമായി ബൈക്കിൽ സഞ്ചരിച്ച യുവാവിന് നേരെ സദാചാര ആക്രമണം നടത്തിയ കേസിലെ പ്രതികൾക്കായി പോലീസ് ലുക്കൗട്ട് നോട്ടീസ് പുറത്തിറക്കി. ഭാര്യയുമായി ബൈക്കിൽ സഞ്ചരിക്കുകയായിരുന്ന യുവാവിനെ കഴിഞ്ഞ ശനിയാഴ്ച രാത്രിയാണ് മൂന്നംഗ സംഘം മർദ്ദിച്ചത്. കേസിലെ പ്രതികളായ പെരുമ്പാവൂർ രായമംഗലം സ്വദേശികളായ അമൽ കണ്ടംപറമ്പിൽ, കിരൺ പറമ്പിവീട്ടിൽ, ബേസിൽ പള്ളിയാംപുറത്ത് എന്നിവർക്കെതിരെയാണ് പോലീസ് ലുക്കൗട്ട് നോട്ടീസ് പുറത്തിറക്കിയത്.
പെരുമ്പാവൂര്‍ കുറുപ്പുംപടിയില്‍ ആണ് സംഭവം നടന്നത്. ബൈക്കിൽ ഭാര്യയുമായി പോകുകയായിരുന്ന ശ്രീജേഷിനെ 3 യുവാക്കൾ ചേർന്ന് മർദ്ദിക്കുകയായിരുന്നു. പിന്നീട് ഇവർ തന്നെ ശ്രീജേഷിനെ താലൂക്ക് ആശുപത്രിയിൽ എത്തിച്ചു.ശ്രീജേഷ് മദ്യപിച്ച് ബൈക്കില്‍നിന്ന് വീണതാണെന്ന് പറഞ്ഞായിരുന്നു ആശുപത്രിയിലെത്തിച്ചത്.സംഭവത്തില്‍ പോലീസ് പ്രതികൾക്കായി അന്വേഷണം തുടരുകയാണ്.