കസബ എന്ന ചിത്രവുമായി ബന്ധപ്പെട്ട നടത്തിയ പരാമര്‍ശങ്ങളില്‍ വീണ്ടും പ്രതികരണവുമായി നടി പാര്‍വതി രംഗത്ത്. ദ് ഇക്കണോമിക് ടൈംസിന് നല്‍കിയ അഭിമുഖത്തിലാണ് പാര്‍വതി വിവാദ വിഷയവുമായി ബന്ധപ്പെട്ട പ്രസ്താവനകള്‍ നടത്തി വീണ്ടും രംഗത്തെത്തിയിരിക്കുന്നത്.
തനിക്ക് ഇനി അവസരങ്ങള്‍ കുറയുമെന്നും തനിക്കെതിരെ ലോബിയിംഗ് നടത്തുമെന്നുമുള്ള വാര്‍ത്തകള്‍ കഴിഞ്ഞ ദിവസങ്ങളില്‍ പുറത്തുവരുന്നുണ്ട്. കഴിഞ്ഞ 12 വര്‍ഷമായി തന്റെ വീടാണ് ഇത്. ഈ വീട് ഉപേക്ഷിച്ച് പോകാന്‍ താന്‍ തയ്യാറല്ല. മറ്റുള്ളവര്‍ക്ക് അവകാശപ്പെട്ടത് പോലെ ഈ ഇന്‍ഡസ്ട്രി തനിക്കും അവകാശപ്പെട്ടതാണ്. തന്റെ വില്‍പവര്‍ കൊണ്ടും കഠിനാധ്വാനം കൊണ്ടുമാണ് താന്‍ ഇവിടെ നില്‍ക്കുന്നതെന്നും പാര്‍വതി പറഞ്ഞു.
അതുകൊണ്ടുതന്നെ ഇനിയും ഒരുപാട് സിനിമകള്‍ ചെയ്യും. പല തടസ്സങ്ങളും നേരിടേണ്ടി വരുമെന്ന് അറിയാമെങ്കിലും താനൊരിടത്തും പോകുന്നില്ലെന്നും അവര്‍ പറഞ്ഞു. മിതത്വം പാലിക്കാന്‍ ഒരുപാട് പേര് ഉപദേശിച്ചു. മിണ്ടാതിരിക്കുന്നത് കൊണ്ട് കിട്ടുന്ന വര്‍ക്കുകള്‍ തനിക്ക് വേണ്ട എന്നാണ് താന്‍ പറഞ്ഞത്. തനിക്ക് ജോലി കിട്ടിയില്ലെങ്കില്‍ അവസരങ്ങള്‍ ഉണ്ടാക്കി എടുക്കുമെന്നും അവര്‍ വ്യക്തമാക്കി.
ഈ വിഷയത്തില്‍ മമ്മൂട്ടി പറഞ്ഞ കാര്യത്തില്‍ തനിക്ക് പൂര്‍ണ തൃപ്തി ഉണ്ടെന്ന് പറയാന്‍ കഴിയില്ല. പക്ഷെ, അദ്ദേഹം സംസാരിച്ചതില്‍ താന്‍ സന്തോഷവതിയാണ്. ഈ വിവാദമുണ്ടായപ്പോള്‍ താന്‍ അദ്ദേഹത്തിന് മെസേജ് അയച്ചിരുന്നു. ഇതൊക്കെ എനിക്ക് ശീലമായെന്ന മറുപടിയാണ് മമ്മൂട്ടി പറഞ്ഞതെന്നും സ്ത്രീവിരുദ്ധതയെ താന്‍ ഇനിയും എതിര്‍ക്കുമെന്നും മറ്റാര്‍ക്കെങ്കിലും വേണ്ടി സ്വന്തം അഭിപ്രായങ്ങള്‍ മൂടി വെയ്ക്കാന്‍ താന്‍ തയ്യാറല്ലെന്നും പാര്‍വതി പറഞ്ഞു.
