2024 തമിഴ് സിനിമയ്ക്ക് അത്ര നല്ല തുടക്കമല്ല നല്‍കിയത്. എന്നാല്‍ ചില ചിത്രങ്ങള്‍ ഇവന്‍ മുന്നേറ്റം ഉണ്ടാക്കുന്ന കാഴ്ചയും കണ്ടു. അക്കൂട്ടത്തില്‍ എടുത്തു പറയേണ്ട ചിത്രമാണ് വിജയ് സേതുപതിയുടെ മഹാരാജ. സോളോ ഹിറ്റ് ഇല്ലെന്ന ആരാധകരുടെ പരാതി തീര്‍ത്ത സിനിമ കൂടിയായിരുന്നു മഹാരാജ. 100 കോടി കളക്ഷന് മുകളില്‍ പറന്ന ചിത്രത്തില്‍ അഭിനയിക്കാന്‍ വിജയ് സേതുപതി വാങ്ങിയ പ്രതിഫലത്തെ കുറിച്ചാണ് ഇപ്പോള്‍ ചര്‍ച്ച.
ദി റൂട്ട്, തിങ്ക് സ്റ്റുഡിയോസ്, പാഷന്‍ സ്റ്റുഡിയോസ് എന്നീ ബാനറുകളില്‍ സുധന്‍ സുന്ദരം, ജഗദീഷ് പളനിസാമി എന്നിവര്‍ ചേര്‍ന്ന് 20 കോടി ബജറ്റിലാണ് സിനിമ നിര്‍മ്മിച്ചത്. നടന്റെ കരിയറിലെ 50-ാമത്തെ സിനിമ കൂടിയായിരുന്നു ഇത്. പ്രോജക്ടില്‍ വലിയ വിശ്വാസമുണ്ടായിരുന്ന വിജയ് സേതുപതി തന്റെ പ്രതിഫലത്തിന്റെ കാര്യത്തിലും വിട്ടുവീഴ്ച ചെയ്തു.
റിലീസിന് മുമ്പ് ഒരു രൂപ പോലും താരം പ്രതിഫലമായി വാങ്ങിയില്ല. മുന്നേ തീരുമാനിച്ച പോലെ 20 കോടി ബജറ്റില്‍ തന്നെ സിനിമ തീര്‍ക്കുകയായിരുന്നു നടന്റെ ലക്ഷ്യം. സിനിമയുടെ ലാഭവിഹിതമാണ് നടന് നേരത്തെ തീരുമാനിച്ച കരാറിലൂടെ ലഭിക്കുക.ചിത്രം 100 കോടിയില്‍ അധികം കളക്റ്റ് ചെയ്തതിനാല്‍ വലിയൊരു തുക നിര്‍മ്മാതാവില്‍ നിന്ന് വിജയ് സേതുപതിയുടെ പോക്കറ്റില്‍ വീഴും.
രചനയും സംവിധാനവും നിതിലന്‍ സ്വാമിനാഥനാണ് നിര്‍വ്വഹിച്ചിരിക്കുന്നത്. അടുത്തിടെ ഒടിടിയില്‍ റിലീസായപ്പോഴും മികച്ച പ്രതികരണമാണ് സിനിമയ്ക്ക് ലഭിച്ചത്.
