Murali Gopi: 'മാപ്പും കോപ്പുമൊന്നും ഇല്ല'; എമ്പുരാന്‍ കത്തുമ്പോള്‍ ഈദ് ആശംസയുമായി മുരളി ഗോപി

ചെറിയ പെരുന്നാള്‍ ദിവസമായ ഇന്ന് ഏവര്‍ക്കും മുരളി ഈദ് ആശംസകള്‍ നേര്‍ന്നു

Murali Gopi

Murali Gopi: എമ്പുരാന്‍ വിവാദം കത്തുമ്പോഴും വിവാദങ്ങളെ കുറിച്ച് ഒരക്ഷരം മിണ്ടാതെ തിരക്കഥാകൃത്ത് മുരളി ഗോപി. എമ്പുരാനില്‍ പ്രധാന കഥാപാത്രത്തെ അവതരിപ്പിച്ച മോഹന്‍ലാല്‍ മാപ്പ് പറഞ്ഞെങ്കിലും ഇപ്പോള്‍ നടക്കുന്ന വിവാദങ്ങളില്‍ എന്തെങ്കിലും പ്രതികരണം നടത്താന്‍ മുരളി ഗോപി തയ്യാറായിട്ടില്ല. 

ചെറിയ  പെരുന്നാള്‍ ദിവസമായ ഇന്ന് ഏവര്‍ക്കും മുരളി ഈദ് ആശംസകള്‍ നേര്‍ന്നു. തന്റെ തിരക്കഥയെ കുറിച്ച് ഇത്രയേറെ ചര്‍ച്ചകളും തര്‍ക്കങ്ങളും നടക്കുമ്പോഴും തീവ്ര വലതുപക്ഷത്തോടു മാപ്പ് പറയാന്‍ മുരളി തയ്യാറല്ല. ഈ ധൈര്യത്തെ അഭിനന്ദിക്കുകയാണ് സോഷ്യല്‍ മീഡിയ.

സംഘപരിവാര്‍ വിമര്‍ശനങ്ങളെ തുടര്‍ന്നാണ് മോഹന്‍ലാല്‍ സോഷ്യല്‍ മീഡിയയിലൂടെ മാപ്പ് പറഞ്ഞത്. ഈ പോസ്റ്റ് എമ്പുരാന്‍ സിനിമയുടെ സംവിധായകന്‍ പൃഥ്വിരാജും പങ്കുവെച്ചു. എന്നാല്‍ മുരളി ഗോപി ഈ പോസ്റ്റ് ഷെയര്‍ ചെയ്തിട്ടില്ല. വിവാദങ്ങളെ തുടര്‍ന്ന് ചില രംഗങ്ങള്‍ വെട്ടിമാറ്റാന്‍ അണിയറ പ്രവര്‍ത്തകര്‍ തീരുമാനിച്ചിട്ടുണ്ട്. എന്നാല്‍ വിവാദ രംഗങ്ങള്‍ നീക്കം ചെയ്യുന്നതില്‍ മുരളി ഗോപിക്ക് താല്‍പര്യമില്ലെന്ന് നേരത്തെ ചില റിപ്പോര്‍ട്ടുകളുണ്ടായിരുന്നു.