'പൃഥ്വിരാജ് അയച്ച സംവിധായകനെ കണ്ടപ്പോഴേ പ്രശ്നം തോന്നി, ഞാനെന്തിന് എന്റെ കാശ് കൊടുത്ത് കടിക്കുന്ന പട്ടിയെ വാങ്ങണം?': ജോബി ജോർജ്

നടൻ പൃഥ്വിരാജിനൊപ്പമുള്ള സിനിമ നടക്കാതെ പോയതിനെക്കുറിച്ച് നിർമാതാവ് ജോബി ജോർജ്. സില്ലി മോങ്ക്സ് മോളിവുഡിനോടാണ് അദ്ദേഹത്തിന്റെ പ്രതികരണം. പൃഥ്വിരാജ് തന്റെ സുഹൃത്താണെന്നും ആരെങ്കിലും മോശമായി ചെന്ന് ഈ കാര്യം പറഞ്ഞ് കൊടുത്താലും താൻ കാര്യമാക്കുന്നില്ലെന്നും ജോബി ജോർജ് പറയുന്നു. 

'പൃഥിരാജ് എനിക്കേറ്റവും പ്രിയപ്പെട്ട നടൻ‌മാരിൽ ഒരാളാണ്. 2012 ൽ പൃഥ്വിരാജിന് ഞാൻ അഡ്വാൻസ് കൊടുത്തതാണ്. ഇന്നീ നിമിഷം വരെയും ആ സിനിമ നടന്നിട്ടില്ല. സിംഹാസനം എന്ന സിനിമയുടെ സമയത്താണ് അഡ്വാൻസ് കൊടുത്തത്. അഡ്വാൻസ് ഞാൻ തിരിച്ച് വാങ്ങിയില്ല. വേണോ എന്ന് ചോദിച്ചപ്പോൾ വേണ്ടെന്ന് ഞാൻ പറഞ്ഞു. എന്നെ ഭയങ്കര ഇഷ്ടമാണ്. അങ്ങനെ പൃഥ്വിരാജ് പറഞ്ഞിട്ട് ഒരു സിനിമയുടെ തിരക്കഥ മുഴുവനും എഴുതിപ്പിച്ചു. ആ കഥ എനിക്കിഷ്ടപ്പെട്ടു.

ഒരു ടെെറ്റിൽ കൊടുത്തു. ജയിംസ് ആന്റ് ആലീസ് എന്ന സിനിമയുടെ സെറ്റിൽ കഥ പറയാൻ പോയി. എന്നാൽ പൃഥ്വിരാജിന് ഈ കഥയിൽ താൽപര്യം തോന്നിയില്ല. 'എനിക്ക് ഈ സിനിമ വർക്കൗട്ടായില്ല, നിങ്ങൾക്ക് വേണ്ടി ഈ സിനിമ ചെയ്യാം, ഓടിയില്ലെങ്കിൽ എന്നോടൊന്നും പറയരുതെ'ന്ന് പൃഥ്വിരാജ് പറഞ്ഞു. നിങ്ങളുടെ കരിയറും സ്റ്റാർ‌ഡവുമാണ് എന്റെ സിനിമാ മോഹത്തേക്കാൾ എനിക്കിഷ്ടം, അതുകൊണ്ട് സിനിമ ചെയ്യേണ്ടെന്ന് ഞാൻ പറഞ്ഞു. 

ഒരുമിച്ച് സിനിമ ചെയ്യണമെന്ന് ഞങ്ങൾ രണ്ട് പേർക്കും ആ​ഗ്രഹമുണ്ട്. രാജു ഒരാളെ പറഞ്ഞ് വിട്ടു. അദ്ദേഹം വന്ന് കഥ പറഞ്ഞെങ്കിലും എനിക്ക് വർക്കായില്ല. ആ സംവിധായകൻ വന്നപ്പോഴേ ഇവൻ പ്രശ്നമാണെന്ന് തോന്നി. ഞാനെന്തിന് എന്റെ കാശ് കൊടുത്ത് കടിക്കുന്ന പട്ടിയെ വാങ്ങണം. അവനോട് പോകാൻ പറഞ്ഞു. അവൻ മലയാളത്തിലെ വേറൊരു വലിയ പ്രൊഡ്യൂസറുമായി കൂടിചേർന്ന് ആ പടം ചെയ്തു. എനിക്ക് തോന്നിയത് പോലെ എട്ട് നിലയിൽ പൊട്ടി. പക്ഷെ ഈ സിനിമയുടെ പ്രൊഡ്യൂസർ പിന്നെ പൃഥ്വിരാജിന്റെ ചങ്കായി മാറി. അത് ദൈവാനു​ഗ്രഹമായി. ഒന്ന് ചീഞ്ഞത് കാെണ്ട് മറ്റൊന്നിന് വളമാകും എന്ന് പറഞ്ഞത് പോലെ താൻ മാറിയത് ആ പ്രൊഡ്യൂസർക്ക് ​ഗുണകരമായി', ജോബി പറഞ്ഞു.