ഇളയ ദളപതി വിജയ് നായകനായെത്തിയ ബിഗിൽ 20 കോടി രൂപ നഷ്ടമുണ്ടാക്കിയെന്ന വാർത്ത കഴിഞ്ഞ ദിവസം പ്രചരിച്ചിരുന്നു. എന്നാൽ ഈ വാർത്തയ്ക്കെതിരെ നിർമ്മാതാവ് അർച്ചന കൽപാത്തി ട്വിറ്ററിലൂടെ രംഗത്തെത്തി. ബിഗിൽ ബോക്‌സോഫീസിൽ വലിയ നഷ്ടമുണ്ടായെന്ന വാർത്ത ഒരു ദേശീയ മാധ്യമം കഴിഞ്ഞ ദിവസം റിപ്പോർട്ട് ചെയ്തിരുന്നു. എന്നാൽ ഈ വാർത്തയെ പൊളിച്ചടുക്കി കൊണ്ടാണ് സിനിമയുടെ നിർമ്മാതാക്കളിലൊരാളായ അർച്ചന എത്തിയത്. ഇതൊരു വ്യാജ വാർത്തയാണെന്ന് ഇവർ സ്ഥിരീകരിച്ചു.
എ ജി എസ് എന്റർ‌ടൈൻ‌മെൻറിൻറെ ബാനറിൽ 2019 ൽ ഏറ്റവും കൂടുതൽ കളക്ഷൻ നേടിയ ചിത്രങ്ങളിലൊന്നായിരുന്നു ബിഗിൽ. റിലീസ് ചെയ്ത ആദ്യ മൂന്ന് ദിവസങ്ങളിൽ ബിഗിലിന്റെ ബോക്സ് ഓഫീസ് കളക്ഷൻ 100 കോടി കടന്നിരുന്നു. ചിത്രം ലോകമെമ്പാടുമായി മൊത്തം 300 കോടി രൂപ കളക്ഷനും നേടി. ചിത്രത്തിൻറെ കളക്ഷൻ കൃത്യമായി ഫയൽ ചെയ്തിട്ടില്ലെന്ന പരാതിയെ തുടർന്ന് കഴിഞ്ഞ വർഷം ചിത്രത്തിനെതിരെ ഇൻകം ടാക്സ് റെയ്ഡ് നടന്നിരുന്നു. ഇൻകം ടാക്സ് പുറത്തുവിട്ട കണക്കുകൾ പ്രകാരം ബിഗിൽ 300 കോടി കളക്ഷനാണ് നേടിയത് .
എട്ടു മാസങ്ങൾക്കിപ്പുറം ഇത്തരമൊരു വാർത്ത വരുന്നത് ഗൂഢാലോചനപരമാണെന്ന് ആരാധകർ സോഷ്യൽ മീഡിയയിലൂടെ ആരോപിക്കുന്നു.
