2023 രജനികാന്തിനെ സംബന്ധിച്ചിടത്തോളം മികച്ചൊരു വര്‍ഷമാണ്. ജയിലര്‍ എന്ന ഒറ്റ ചിത്രത്തിലൂടെ കരിയറില്‍ വലിയ നേട്ടങ്ങള്‍ സ്വന്തമാക്കാനായി. 600 കോടിക്ക് മുകളില്‍ കളക്ഷന്‍ സ്വന്തമാക്കുന്ന ആദ്യ തമിഴ് ചിത്രമായി ജയിലര്‍ മാറിയിരുന്നു. ഇപ്പോള്‍ പുതിയ സിനിമയുടെ തിരക്കുകളിലേക്ക് അദ്ദേഹം കടന്നിരിക്കുകയാണ്. അതിനിടെ വിജയ് നായകനായി എത്തിയ ലിയോ ജയിലര്‍ കളക്ഷന്‍ റെക്കോര്‍ഡ് മറികടക്കുമോ എന്നതാണ് ഇനി അറിയാനുള്ളത്. ലോകേഷ് കനകരാജ് സംവിധാനം ചെയ്യുന്ന രജനികാന്തിന്റെ 171ാം ചിത്രം ഒരുങ്ങുകയാണ്. ജയിലറില്‍ നടന്‍ വാങ്ങിയതിനെക്കാള്‍ ഉയര്‍ന്ന പ്രതിഫലമാണ് ഈ ചിത്രത്തില്‍ അഭിനയിക്കാനായി വാങ്ങുന്നത് എന്നാണ് റിപ്പോര്‍ട്ടുകള്‍.
രജനികാന്തിന്റെ അവസാനത്തെ ചിത്രമാകും ഇതൊന്നും പറയപ്പെടുന്നു. എല്‍സിയുവില്‍ വരുന്ന സിനിമ അല്ലെന്ന് നേരത്തെ സംവിധായകന്‍ വെളിപ്പെടുത്തിയിരുന്നു. ഇപ്പോഴിതാ ജയിലറിന്റെ വിജയത്തോടെ രജനികാന്ത് പ്രതിഫലം ഉയര്‍ത്തി.260 മുതല്‍ 280 കോടി വരെയാണ് പുതിയ സിനിമയ്ക്കായി നടന്‍ വാങ്ങുന്നത് എന്നാണ് റിപ്പോര്‍ട്ടുകള്‍.
തമിഴ് സിനിമയിലെ തന്നെ ഏറ്റവും ഉയര്‍ന്ന പ്രതിഫലമാകും ഇത്. ഇതുവരെ ഒരു താരവും 200 കോടി പ്രതിഫലമായി ചോദിച്ചിട്ടില്ല. അവിടെയാണ് രജനികാന്ത് എന്ന ബ്രാന്‍ഡിന്റെ വില. പ്രതിഫലത്തിന്റെ കാര്യത്തില്‍ അന്തിമ തീരുമാനത്തില്‍ എത്തുന്നതിനു മുമ്പ് സിനിമയുടെ വിതരണ അവകാശത്തില്‍ കുറച്ച് ഭാഗം രജനികാന്തിന് നല്‍കിയേക്കും. ഇതിനെക്കുറിച്ച് നിര്‍മ്മാതാവ് സംസാരിച്ചപ്പോള്‍ അത് വേണ്ടെന്ന് നിലപാട് ആയിരുന്നു രജനി എടുത്തത്. ഇന്ത്യന്‍ സിനിമയിലെ ഒരു താരവും ഇത്രയും വലിയ തുക പ്രതിഫലമായി വാങ്ങിയിട്ടില്ല. 250 കോടിക്കും മുകളില്‍ പ്രതിഫലം വാങ്ങുന്ന ആദ്യ താരമായി രജനി മാറും.
