തൊട്ടതെല്ലാം പൊന്നാക്കി പ്രഭാസ്: സാഹോ 300 കോടി ക്ലബിലേക്ക്
94 കോടി രൂപയാണ് ബോളിവുഡില്‍ നിന്ന് പ്രഭാസ് ചിത്രം സാഹോ കരസ്ഥമാക്കിയത്.
തൊട്ടതെല്ലാം പൊന്നാക്കി പ്രഭാസിന്‍റെ ജൈത്രയാത്ര തുടരുന്നു. താരത്തിന്‍റെ രണ്ടാം ചിത്രമായ സാഹോയും ബോക്‌സ് ഓഫീസ് വന്‍ നേട്ടം കൊയ്യുകയാണ്. മൂന്നുദിനത്തെ കലക്ഷന്‍ റിപ്പോര്‍ട്ട് പുറത്തു വന്നപ്പോള്‍ സാഹോ മുന്നൂറു കോടി ക്ലബിലേക്ക് കുതിക്കുകയാണ്. 294 കോടിയിലധികം മൂന്നു ദിനത്തെ പ്രദര്‍ശനം കൊണ്ട് ചിത്രം നേടിയതായി നിര്‍മ്മാതാക്കള്‍ വ്യക്തമാക്കി. 94 കോടി രൂപയാണ് ബോളിവുഡില്‍ നിന്ന് പ്രഭാസ് ചിത്രം സാഹോ കരസ്ഥമാക്കിയത്.
പ്രദര്‍ശന ദിനമായ വെള്ളിയാഴ്ച്ച ബോളിവുഡ് കലക്ഷന്‍ 24 കോടിയായിരുന്നു. രണ്ടാം ദിനം 25.20 കോടിയും മൂന്നാംദിനം 29.48 കോടിയും നാലാം ദിനം 14.2 കോടിയും സാഹോ വാരിക്കോരി. ആദ്യദിനം ബോളിവുഡില്‍ വന്‍ കലക്ഷന്‍ നേടുന്ന മൂന്നാം ചിത്രമെന്ന ഖ്യാതിയും ഇതോടെ സാഹോ സ്വന്തമാക്കി. ഓവര്‍സീസ് കലക്ഷന്‍ 53.25 കോടിയാണ് മൂന്നുദിവസത്തെ സാഹോയുടെ കലക്ഷന്‍. ബോക്‌സ് ഓഫീസിലും ചരിത്രം തിരുത്തിക്കുറിച്ചുള്ള സാഹോയുടെ കുതിപ്പ് പ്രഭാസിന്‍റെ താരമൂല്യമാണ് വ്യക്തമാക്കുന്നത്.
ബാഹുബലിയിലൂടെ തന്‍റെ അഭിനയ മികവ് പ്രേക്ഷകര്‍ക്ക് മുന്നില്‍ തെളിയിച്ച പ്രഭാസ് തന്നെയാണ് സാഹോയുടെ പ്രധാന ഘടകം. നായകന്‍റെ താരമൂല്യവും അഭിനയശേഷിയും വാണിജ്യപരമായി സംവിധായകന്‍ ഉപയോഗപ്പെടുത്തിയ മറ്റൊരു സിനിമയാണ് സാഹോ.
