യുഎസ് പ്രസിഡന്റ് ജോ ബൈഡന് കോവിഡ്

ലാസ് വേഗസില്‍ യുണിഡോസ് യുഎസ് വാര്‍ഷിക സമ്മേളനത്തെ അഭിസംബോധന ചെയ്യാനിരിക്കെയാണ് ബൈഡന് കോവിഡ് സ്ഥിരീകരിച്ചിരിക്കുന്നത്

യുഎസ് പ്രസിഡന്റ് ജോ ബൈഡന് കോവിഡ് സ്ഥിരീകരിച്ചു. ജലദോഷവും ചുമയും ഉള്‍പ്പെടെയുള്ള കോവിഡ് ലക്ഷണങ്ങളാണ് ഉള്ളതെന്നും പാക്‌സ് ലോവിഡ് ആദ്യ ഡോസ് നല്‍കിയെന്നും അദ്ദേഹത്തെ ശുശ്രൂഷിക്കുന്ന ഡോ.കെവിന്‍ ഒ'കോണറിനെ ഉദ്ധരിച്ച് വൈറ്റ് ഹൗസ് പ്രസ് സെക്രട്ടറി കരീന്‍ ജീന്‍ പിയര്‍ വ്യക്തമാക്കി. 

ലാസ് വേഗസില്‍ യുണിഡോസ് യുഎസ് വാര്‍ഷിക സമ്മേളനത്തെ അഭിസംബോധന ചെയ്യാനിരിക്കെയാണ് ബൈഡന് കോവിഡ് സ്ഥിരീകരിച്ചിരിക്കുന്നത്. ഡെലവെയറിലെ റെഹോബോത്ത് ബീച്ചിലുള്ള വസതിയിലാണ് ബൈഡന്‍ ഐസൊലേഷനില്‍ കഴിയുക. 

തനിക്ക് കോവിഡ് സ്ഥിരീകരിച്ചെന്നും ആരോഗ്യ സംബന്ധമായ ബുദ്ധിമുട്ടുകളൊന്നും ഇല്ലെന്നും ബൈഡന്‍ സോഷ്യല്‍ മീഡിയയിലൂടെ അറിയിച്ചു. രോഗം മാറുന്നതുവരെ ഐസൊലേഷനില്‍ ആയിരിക്കുമെന്നും അമേരിക്കന്‍ ജനതയ്ക്കായി ഐസൊലേഷനില്‍ ഇരുന്ന് പ്രവര്‍ത്തിക്കുമെന്നും ബൈഡന്‍ പറഞ്ഞു.