ഈ മാസം 24, 25 തീയ്യതികളിലായി സൗദി അറേബ്യയിലെ ജിദ്ദയില്‍ ഐപിഎല്‍ മെഗാതാരലേലം നടക്കാനിരിക്കുകയാണ്. ഐപിഎല്‍ 2025 സീസണിനായി ആകെ 1574 കളിക്കാരാണ് ഇത്തവണ ലേലത്തില്‍ പങ്കെടുക്കാനായി തങ്ങളുടെ പേരുകള്‍ രജിസ്റ്റര്‍ ചെയ്തിരിക്കുന്നത്. ഇതില്‍ ഇറ്റലിയില്‍ നിന്നും ഒരു കളിക്കാരനും രജിസ്റ്റര്‍ ചെയ്തിട്ടുണ്ട്. ഇതോടെ ഇതാരാകുമെന്ന് അറിയാനുള്ള കൗതുകത്തിലാണ് ക്രിക്കറ്റ് ആരാധകര്‍. ഇപ്പോഴിതാ പുറത്തുവരുന്ന വിവരങ്ങള്‍ പ്രകാരം ഇറ്റാലിയന്‍ ഓള്‍ റൗണ്ടര്‍ താരമായ തോമസ് ഡ്രാക്കയാണ് ഇതെന്നാണ് റിപ്പോര്‍ട്ടുകള്‍ പറയുന്നത്.
കാനഡയില്‍ നടന്ന ഗ്ലോബര്‍ ടി20 ലീഗില്‍ ബ്രാപ്റ്റണ്‍ വോള്‍വ്‌സിന്റെ താരമായിരുന്ന തോമസ് ഡ്രാക്ക തന്റെ ഓള്‍ റൗണ്ട് മികവ് കൊണ്ട് ശ്രദ്ധിക്കപ്പെട്ടിരുന്നു. കാനഡ ഗ്ലോബല്‍ ടി20 ലീഗില്‍ കളിച്ച ആറ് കളികളില്‍ നിന്നും 11 വിക്കറ്റുകളാണ് താരം നേടിയത്. ഇറ്റലിക്കായി രാജ്യാന്തര ക്രിക്കറ്റില്‍ 4 ടി20 മത്സരങ്ങളില്‍ നിന്നും 8 വിക്കറ്റുകളും താരം നേടിയിട്ടുണ്ട്. ഐപിഎല്‍ താരലേലത്തില്‍ ഓള്‍ റൗണ്ടര്‍ വിഭാഗത്തിലാണ് ഡ്രാക്ക തന്റെ പേര് രജിസ്റ്റര്‍ ചെയ്തത്. 30 ലക്ഷം രൂപയാണ് തന്റെ അടിസ്ഥാനവിലയായി ഡ്രാക്ക ക്വാട്ട് ചെയ്തിരിക്കുന്നത്. താരലേലത്തിനുള്ള ചുരുക്കപ്പട്ടികയില്‍ താരം ഇടം നേടുമോ എന്നതാണ് നിലവില്‍ ആരാധകര്‍ ഉറ്റുനോക്കുന്നത്.
