പി.വി.അന്‍വറിനെതിരെ തൃശൂരില്‍ പരാതി
മോഹന്‍ദാസിനു ആര്‍എസ്എസ് ബന്ധമുണ്ട്. താന്‍ അഞ്ചുനേരം നിസ്‌കരിക്കുന്നതാണ് അദ്ദേഹത്തിനു പ്രശ്‌നം തുടങ്ങിയ പരാമര്‍ശങ്ങളാണ് അന്‍വര്‍ വാര്‍ത്താസമ്മേളനത്തില്‍ ഉന്നയിച്ചത്
എംഎല്‍എ പി.വി.അന്‍വറിനെതിരെ തൃശൂരില്‍ പരാതി. മതസ്പര്‍ധ വളര്‍ത്തുന്ന രീതിയില്‍ പ്രചരണം നടത്തുന്നതായി ആരോപിച്ച് തൃശൂര്‍ സിറ്റി പൊലീസ് സ്റ്റേഷനിലാണ് പരാതി ലഭിച്ചിരിക്കുന്നത്. തൃശൂരിലെ ഇടതുപക്ഷ പ്രവര്‍ത്തകനായ കെ.കേശവദാസാണ് പരാതിക്കാരന്‍. മലപ്പുറം സിപിഎം ജില്ലാ സെക്രട്ടറി ഇ.എന്‍.മോഹന്‍ദാസിനെതിരെ വര്‍ഗീയവാദി, മുസ്ലിം വിരോധി തുടങ്ങിയ പരാമര്‍ശങ്ങള്‍ അന്‍വര്‍ നടത്തിയിരുന്നു. ഈ പരാമര്‍ശങ്ങളാണ് പരാതിക്ക് ആധാരം.
തിരഞ്ഞെടുപ്പില്‍ തോല്‍പ്പിക്കാന്‍ മോഹന്‍ദാസ് ശ്രമിച്ചു. മോഹന്‍ദാസിനു ആര്‍എസ്എസ് ബന്ധമുണ്ട്. താന്‍ അഞ്ചുനേരം നിസ്‌കരിക്കുന്നതാണ് അദ്ദേഹത്തിനു പ്രശ്‌നം തുടങ്ങിയ പരാമര്‍ശങ്ങളാണ് അന്‍വര്‍ വാര്‍ത്താസമ്മേളനത്തില്‍ ഉന്നയിച്ചത്. മോഹന്‍ദാസിനു മുസ്ലിം വിരോധമാണെന്നും അന്‍വര്‍ ആരോപിച്ചിട്ടുണ്ട്.
എന്നാല്‍ അന്‍വറിന്റെ ആരോപണങ്ങളെ പൂര്‍ണമായി മോഹന്‍ദാസും ജില്ലയിലെ സിപിഎം നേതൃത്വവും തള്ളുകയായിരുന്നു. അന്‍വര്‍ നാട്ടില്‍ ഭിന്നിപ്പ് ഉണ്ടാക്കാന്‍ ശ്രമിക്കുകയാണെന്നും വര്‍ഗീയ കാര്‍ഡ് കളിക്കുകയാണെന്നും സിപിഎമ്മും തിരിച്ചടിച്ചു.
