കൊവിഡ് 19 കേരളത്തിൽ റിപ്പോർട്ട് ചെയ്യപ്പെട്ട സാഹചര്യത്തിൽ ആറ്റുകാൽ പൊങ്കാലയ്‌ക്ക് ആളുകൾ ഒത്തുകൂടുന്നതിൽ ആശങ്കയുണ്ടെന്ന് ഇന്ത്യൻ മെഡിക്കൽ അസോസിയേഷൻ. ഒരുപാട് ആളുകൾ ഒത്തുകൂടുന്ന ചടങ്ങാണതെന്നും നിലവിലെ സാഹചര്യത്തിൽ ഇത് വലിയ ആശങ്ക സൃഷ്ടിക്കുന്നതായും ഗൗരവകരമായ വിഷയമായതിനാൽ തന്നെ സർക്കാരിനെ വിവരങ്ങൾ അറിയിച്ചിട്ടുണ്ടെന്നും ഐഎംഎ അറിയിച്ചു.
അതേസമയം ആറ്റുകാൽ പൊങ്കാലയ്‌ക്ക് തടസ്സങ്ങളില്ലെന്നാണ് ആരോഗ്യമന്ത്രാലയം വ്യക്തമാക്കിയിട്ടുള്ളത്. എന്നാൽ ശ്വാസ തടസ്സം, ചുമ, പനി തുടങ്ങിയ രോഗലക്ഷണങ്ങള്‍ ഉള്ളവര്‍ പൊങ്കാലയില്‍ പൊങ്കാലയിൽ നിന്നും വിട്ടുനിൽക്കണമെന്നും ആരോഗ്യമന്ത്രി തന്നെ നിർദേശം നൽകിയിട്ടുണ്ട്. നിലവിൽ പൊങ്കാലയോടനുബന്ധിച്ച് ഡോക്ടര്‍മാരും പാരാമെഡിക്കല്‍ ജീവനക്കാരുമുള്‍പ്പെടുന്ന 23 സംഘങ്ങളെ നിരീക്ഷണത്തിനായി നിയോഗിച്ചിട്ടുണ്ട്. 12 ആംബുലന്‍സ്, അഞ്ച് ബൈക്ക് ആംബുലന്‍സ് എന്നിവയും നിരീക്ഷണത്തിനായി സജ്ജമാക്കിയിട്ടുണ്ട്. കൂടാതെ പൊങ്കാല നടക്കുന്ന സമയങ്ങളില്‍ ഇവിടെയെല്ലാം വീഡിയോ ചിത്രീകരണം ഉണ്ടാകും. ഭാവിയില്‍ ആര്‍ക്കെങ്കിലും രോഗലക്ഷണങ്ങള്‍ പിന്നീട് വന്നാല്‍ ഇവരുമായി ഇടപഴകിയവരെ കണ്ടെത്തുന്നതിന് ഈ വീഡിയോ ദൃശ്യങ്ങൾ ഉപയോഗകരമാവും. കൂടാതെ റെയിൽവേ സ്റ്റേഷനുകൾ,ബസ് സ്റ്റാന്റ്,സമീപത്തുള്ള ക്ഷേത്രങ്ങൾ എന്നിവക്ക് സമീപവും ബോധവത്കരണത്തിനായി ലഘുലേഖകൾ വിതരണം ചെയ്യാനും ആരോഗ്യവകുപ്പ് ഉദ്ദേശിക്കുന്നുണ്ട്.
