Kerala Weather: ഇന്ന് മഴദിനം; എട്ട് ജില്ലകള്‍ക്കു മുന്നറിയിപ്പ്

ജൂലൈ 17 വരെ പൊതുവെ എല്ലാ ജില്ലകളിലും മഴ സാധ്യതയുണ്ടെങ്കിലും പൊതുവെ ഈ കാലയളവില്‍ ലഭിക്കുന്ന മഴയേക്കാള്‍ അളവ് കുറവായിരിക്കും

Kerala Weather News in Malayalam: സംസ്ഥാനത്ത് ഇന്ന് മഴദിനം. എട്ട് ജില്ലകളില്‍ യെല്ലോ അലര്‍ട്ട്. എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍ഗോഡ് ജില്ലകളിലാണ് യെല്ലോ അലര്‍ട്ട് പുറപ്പെടുവിച്ചിരിക്കുന്നത്. ഒറ്റപ്പെട്ട ശക്തമായ മഴയാണ് യെല്ലോ അലര്‍ട്ട് കൊണ്ട് അര്‍ത്ഥമാക്കുന്നത്. 

ജൂലൈ 17 വരെ പൊതുവെ എല്ലാ ജില്ലകളിലും മഴ സാധ്യതയുണ്ടെങ്കിലും പൊതുവെ ഈ കാലയളവില്‍ ലഭിക്കുന്ന മഴയേക്കാള്‍ അളവ് കുറവായിരിക്കും. കാസര്‍ഗോഡ്, കണ്ണൂര്‍ ജില്ലകളിലും തൃശൂര്‍ മുതല്‍ ആലപ്പുഴ വരെ തീരദേശ മേഖലയിലും ആയിരിക്കും കൂടുതല്‍ മഴ. ജൂലൈ 18 മുതല്‍ 24 വരെയുള്ള ദിവസങ്ങളില്‍ കാലവര്‍ഷം കനക്കും. 

സംസ്ഥാനത്ത് ജൂലൈ 15 വരെ ശക്തമായ കാറ്റിനു സാധ്യതയുള്ളതായി മുന്നറിയിപ്പുണ്ട്. മണിക്കൂറില്‍ 40 മുതല്‍ 50 കിലോമീറ്റര്‍ വരെ വേഗതയില്‍ ശക്തമായ കാറ്റിന് സാധ്യതയുണ്ടെന്നാണ് കേന്ദ്ര കാലാവസ്ഥ വകുപ്പിന്റെ പ്രവചനം. അതിനാല്‍ മത്സ്യത്തൊഴിലാളികളും തീരദേശവാസികളും ജാഗ്രത പാലിക്കുക.