പിടിച്ചത് എൽഡിഎഫ് വോട്ടുകൾ,പിണറായിസത്തിനെതിരായ പോരാട്ടമെന്ന് പി വി അൻവർ

നിലമ്പൂര്‍ ഉപതിരെഞ്ഞെടുപ്പില്‍ തനിക്ക് ലഭിച്ച വോട്ടുകള്‍ പിണറായിസത്തിന് എതിരായ ജനവിധിയാണെന്ന് പി വി അന്‍വര്‍. പതിനായിരം വോട്ട് മണ്ഡലത്തില്‍ നേടിയതിന് പിന്നാലെയായിരുന്നു അന്‍വറിന്റെ പ്രതികരണം. വോട്ടെണ്ണല്‍ നാല്പത് ശതമാനം പിന്നിട്ടപ്പോള്‍ തനിക്ക് ലഭിച്ച വോട്ടുകള്‍ പതിനായിരം കടന്നു. ലഭിച്ചത് യുഡിഎഫ് വോട്ടുകളാണെന്ന് വിലയിരുത്തല്‍ തെറ്റാണ്. പിണറായിസത്തിനെതിരെയാണ് പോരാട്ടം ആരംഭിച്ചത്. ലഭിച്ചത് എല്‍ഡിഎഫില്‍ നിന്നുള്ള വോട്ടുകളാണ്. പി വി അന്‍വര്‍ മാധ്യമങ്ങളോട് പ്രതികരിച്ചു.

പിണറായിസം കേരളത്തില്‍ നിലനില്‍ക്കുന്നു. മലയോര കര്‍ഷകരുടെ വിഷയം പരിഗണിക്കാതെ ഒരു മുന്നണിക്കും മുന്നോട്ട് പോകാനാവില്ല. യുഡിഎഫ് ഇക്കാര്യം ഗൗരവകരമായി വിലയിരുത്തണം. കര്‍ഷകസംഘടനകളെ ഒപ്പം നിര്‍ത്തി അടുത്ത തിരെഞ്ഞെടുപ്പില്‍ വിഷയം സജീവമായി ഉയര്‍ത്തി കാണിക്കണമെന്നും പി വി അന്‍വര്‍ ആവശ്യപ്പെട്ടു.