ശക്തമായ പോരാട്ടം നടക്കുന്ന വടകര മണ്ഡലത്തില്‍ എല്‍ഡിഎഫ് സ്ഥാനാര്‍ഥി പി ജയരാജന് വേണ്ടി വോട്ട് അഭ്യര്‍ഥിച്ച നടൻ സാബുമോൻ ഏവരേയും ഞെട്ടിച്ചു. പ്രധാനമന്ത്രി നരേന്ദ്ര മോദിയുടെ കടുത്ത ആരാധകനാണ് താനെന്ന് പറഞ്ഞാണ് താരം പ്രസംഗം ആരംഭിച്ചത്. ഇതാണ് വേദിയിലും സദസിലും ഉണ്ടായിരുന്നവരെ ഞെട്ടിച്ചത്.
മോദിയുടെ ആരാധകനാണ് താനെന്ന് പറഞ്ഞ് പ്രസംഗം തുടങ്ങിയ സാബുമോൻ പ്രധാനമന്ത്രിയെ ട്രോളുകയായിരുന്നുവെന്ന് പതിയെ ആണ് എല്ലാവര്‍ക്കും മനസിലായത്. ഇതോടെ സദസില്‍ പൊട്ടിച്ചിരിയും ആര്‍പ്പ് വിളികളും ശക്തമായി.
ഭരണനേട്ടങ്ങളായി മോദി സര്‍ക്കാര്‍ പറയുന്ന നോട്ട് നിരോധനത്തിനേയും ജിഎസ്ടിയേയും പ്രസംഗത്തിൽ സാബുമോൻ കണക്കറ്റ് കളിയാക്കി.
ലോകത്തിന് ഭീഷണിയായ ആഗോളതാപനം കുറയ്‌ക്കാന്‍ മോദി സഹായിച്ചു. ഇത്തരത്തിലുള്ള ബുദ്ധി മോദിക്കല്ലാതെ വേറെ ആർക്കും ഉണ്ടാകില്ല. അടുക്കളയിൽ ആഹാര പാചകം നിർത്തിച്ചിട്ട് ആഗോളതാപനത്തിനായി കോൺട്രിബ്യൂട്ട് ചെയ്ത ആളാണ് പ്രധാനമന്ത്രിയെന്നും സാബുമോൻ പറഞ്ഞു.
പി ജയരാജന് വേണ്ടി സംഘടിപ്പിച്ച തെരഞ്ഞെടുപ്പ് യോഗത്തിൽ പ്രസംഗിക്കാന്‍ എത്തിയതാണ് താരം.
